Maska taqpaǵan Óskemen ákimine qatysty tekserý bastaldy

ÓSKEMEN. QazAqparat – Óskemen qalasynyń ákimi Jaqsylyq Omardyń B.Aleksandrov atyndaǵy Sport saraıynda ótken sharada maska taqpaǵandyǵyna qatysty ShQO Sanıtarııalyq-epıdemııalogııalyq baqylaý departamenti tekserý júrgizýde, dep habarlaıdy QazAqparat tilshisi.

Sońǵy kúnderi áleýmettik jelilerde shahar basshysy Jaqsylyq Omardyń birneshe adamnyń arasynda maska taqpaı otyryp túsken fotosýreti tarap ketken bolatyn. Jurtshylyq óńirdegi karantındik shekteýlerdiń saqtalmaǵandyǵyna narazylyq bildirdi.

«Bul B.Aleksandrov atyndaǵy Sport saraıynda ótken sharada jasalǵan sýret. QR jáne oblystyń bas memlekettik sanıtarııalyq dárigerleriniń qaýlylaryna sáıkes kórermenderdiń qatysýymen jalpy adamdar sanyn 20%-dan asyrmaı, sporttyq is-sharalardy ótkizýge ruqsat berilgen. Qazirgi ýaqytta atalǵan fakti boıynsha ShQO SEBD Óskemen qalalyq Sanıtarııalyq-epıdemıologııalyq baqylaý basqarmasy tekserý júrgizýde. Túsken materıaldar zańnamada belgilengen merzimde qaralatyn bolady», - dep habarlady ShQO Sanıtarııalyq-epıdemııalogııalyq baqylaý departamentiniń baspasóz qyzmetinen.

Osy rette, departament mamandary jeke jáne zańdy tulǵalarǵa Shyǵys Qazaqstan oblysynyń «jasyl» aımaqta bolǵanyna qaramastan, QR jáne oblystyń bas memlekettik sanıtarııalyq dárigerleriniń qaýlylarymen belgilengen shekteý sharalaryn qatań saqtaý qajettigin eske saldy.