Maska kımegen almatylyqtar dúkenderge kire almaıdy
Búkil aýmaqtyq memlekettik organdar men olarǵa qarasty vedomstvolar, zańdy tulǵalar jumys kúnin barynsha qysqartýy tıis. Sondaı-aq olar ǵımaratqa kúnine kem degende eki ret dezınfektsııa jasap, tazalaý arqyly óz jumyskerleriniń jáne klıentteriniń qaýipsizdigin qamtamasyz etýi kerek.
Odan bólek, dárihana, dúken jáne medıtsınalyq mekeme sııaqty ózge de uıymdardyń kirip-shyǵatyn esiginiń mańynda sanıtaızer ornatylady.
«Ǵımarat ishinde adam sanynyń kóp bolmaýyna mán berilgeni durys. 20 sharshy metrde bir adamnan artyq júrmeýge tıis. Mekemeniń ishinde de, syrtynda da adamdar arasyndaǵy qashyqtyq eki metrden kem bolmasyn. Kezekte bes adamnan artyq turmaýyn qatań qadaǵalaý kerek. Ǵımarattyń ishine arnaıy qorǵanys quralynsyz (medıtsınalyq maskasyz) kirgizbesin» delingen Almatyda karantın rejımin kúsheıtý jónindegi qosymsha sharalar tiziminde.
Eske sala keteıik, búgin túngi saǵat 00:00-den bastap Nur-Sultan men Almatyda karantın rejımi kúsheıdi.