Maska, dezınfektsııalyq tonnel: Almatyda oqýshylar mektepke qalaı qabyldanady
ALMATY. QazAqparat – Búgin Almaty mektepterinde jańa oqý jylynyń bastalýyna arnalǵan saltanatty sharalar onlaın rejımde ótti. Bıyl qalada 27 myńnan astam bala birinshi synypqa bardy, dep habarlaıdy QazAqparat tilshisi.
Qashyqtan oqytý formatyn eskere otyryp, jańa oqý jyly qarsańynda qala ákimshiligi oqýshylar men muǵalimderdi qajetti tehnıkamen jáne sapaly ınternetpen qamtamasyz etti.
Almaty qalasy, Áýezov aýdany bilim bóliminiń bas mamany Gúlnár Sattarova A. Baıtursynov atyndaǵy №139 mektep-gımnazııasynyń kezekshi toptarynyń jumysy týraly aıtyp berdi.
«№139 mektepte 1 jáne 2-synyp oqýshylary úshin eki kezekshi top uıymdastyryldy. Mektep aýmaǵyna kireberiste medıtsına qyzmetkeri balany qarsy alady jáne temperatýrany baılanyssyz teplovızormen ólsheıdi. Ata-analar balany mektepke kirgenge deıin jetkizedi. Bala sol jerde maskany aýystyryp, qoldaryn eritindimen óńdep, keıin synyp jetekshisimen dezınfektsııalyq tonnel arqyly ótedi. Eki kabınet daıyndaldy», – dedi Gúlnár Sattarova.
Sondaı-aq ol ár synypta 15 balaǵa 15 parta qoıylǵanyn atap ótti.
Óz kezeginde M. Maqataev atyndaǵy № 140 gımnazııanyń dırektory Sánııa Tileýbaı búgin ótken onlaın jıyn týraly aıtty. 2020-2021 oqý jyly mektepte 2246 oqýshy, ıaǵnı 75 synyp bar. Oqý jylyna mektep tolyǵymen daıyn.
«Birinshi toqsanda sabaqtar onlaın rejıminde, ZOOM baǵdarlamasy arqyly uıymdastyrylady. Sondyqtan kompıýterleri joq 70 oqýshy tehnıkalyq quraldarmen qamtamasyz etilgen. Mektep oqýshylary men muǵalimderi ınternet jelisimen tolyq qamtylǵan», – dedi Sánııa Tileýbaı.
Sondaı-aq, ol gımnazııada az qamtylǵan otbasylardan shyqqan 117 oqýshy bilim alyp jatqanyn, onyń ishinde tórt bala qamqorlyqta ekenin aıtty. Bul balalar da tehnıkalyq quraldarmen qamtamasyz etildi.
Sonymen qatar, S.Tileýbaı № 140 mektepte kezekshi synyptardyń joq ekenin aıtty. Sebebi, bilim mekemesine ata-anadan ótinish túspegen. Balalardyń ata-analary qashyqtan oqytýdy qalaıdy. Alaıda, mektep qajet bolǵan jaǵdaıda, sanıtarlyq talaptardy saqtaı otyryp, oqýshylardy kezekshi toptarǵa qabyldaýǵa tolyq daıyn.
