Maska baǵasyn arzandatýǵa tyrysamyz – Lıýdmıla Bıýrabekova
«Shyndyǵynda aqpanda maska baǵasy 15 teńge edi. Ol kezde indet órship turǵan bolatyn. Barlyq elder, onyń ishinde Qazaqstan da jeke qorǵanysh zattaryn eksportqa shyǵarýdy toqtatty. Degenmen, jeke qorǵanysh zattaryn, maskalardy shyǵaratyn otandyq óndirýshiler bolǵanymen biz ımportqa táýeldimiz. Biz syrttan, onyń ishinde Qytaıdan ákelinetin shıkizatqa táýeldi bolyp otyrmyz. Sol ýaqytta shıkizat qoljetimdi bolmady. Otandyq óndirýshilerimiz ózderiniń uzaqmerzimdi kelisimsharttary aıasynda medıtsına qyzmetkerlerin qamtamasyz etý úshin jumys istedi», -dedi vıtse-mınıstr Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, sol kezde otandyq naryqta maska tapshylyǵy oryn alyp, Densaýlyq saqtaý mınıstrligi otandyq óndirýshilermen ónimdi óndirý qýatyn arttyrý týraly kelissózder júrgizdi.
«Memleket medıtsınalyq maska baǵasyn rettemeıdi. Tótenshe jaǵdaı rejımi kezinde shekti baǵany bekitý týraly sheshimdi memlekettik komıssııa naryqty turaqtandyrý úshin qabyldady. Esterińizde bolsa, sol ýaqytta keıbir adamdardyń alaıaqtyq áreketteri oryn aldy. Sondyqtan osyndaı sheshim qabyldanyp, maska baǵasy 118 teńge bolyp bekitildi. Naryq ashylyp, shıkizat paıda bolǵannan keıin de maska qymbattaýyn toqtatpady. Farmatsevtıka ónerkásin qadaǵalaıtyn Indýstrııa jáne ınfraqurylymdyq damý mınıstrliginiń bizge usynǵan málimetterine sáıkes, shıkizat 20-25 ese qymbattaǵan. Sondyqtan maska baǵasy burynǵy 15 teńge deńgeıine túspeıdi. Qazirgi ýaqytta óndirýshilerimizden maska baǵasyn tómendetý úshin kelissóz júrgizip jatyrmyz. Taıaý ýaqytta maska baǵasy 60 teńgege deıin arzandap qalýy múmkin», - dedi Lıýdmıla Bıýrabekova.