Mask jaqyn bolashaqta Marsta táýelsiz órkenıet qurýdy josparlap otyr
ASTANA. KAZINFORM — SpaceX 20-30 jyldan keıin Jerdiń eshqandaı qoldaýynsyz Marsta órkenıet qurýdy josparlap otyr. Bul týraly kompanııa basshysy Ilon Mask Fox News arnasyna bergen suhbatynda málimdedi.
— Biz Marsqa barǵysy keletinderdiń barlyǵyn jiberip, ol jerde ózin-ózi tolyq qamtamasyz etetin órkenıet qurǵymyz keledi. Bul kompanııanyń uzaq merzimdi maqsaty — ómirdi birneshe planetaǵa taratý. Meniń oıymsha, biz muny 20-30 jylda jasaı alamyz, — dedi Mask.
15 naýryzda Mask 2026 jyldyń sońynda Starship ǵarysh kemesi Optimus gýmanoıd robotymen Marsqa ushyrylatynyn habarlady. Onyń aıtýynsha, robottyq ushýlar sátti júzege assa, 2029 jyly Marsqa adamdardy jibere bastaıdy.
Aıta keteıik, Mask «eń aqyldy jasandy ıntellektini» iske qosatynyn jazǵan edik.