Mask Tramp ákimshiliginen ketti

ASTANA. KAZINFORM – Mıllıarder, AQSh úkimetiniń tıimdiligi departamentiniń (DOGE) basshysy Ilon Mask AQSh ákimshiligindegi qyzmet merzimi aıaqtalyp jatqanyn habarlady, dep jazdy BBC.

Ilon Mask prezıdent Donald Trampqa alǵysyn bildirdi.

— Meniń arnaıy memlekettik qyzmetker retindegi merzimim aıaqtalyp jatqanda, men prezıdent Donald Trampqa maǵan ysyrapshyl shyǵyndardy azaıtýǵa múmkindik bergeni úshin alǵys aıtqym keledi, — dep jazdy ol óziniń X áleýmettik jelidegi akkaýntynda.

«DOGE mıssııasy ýaqyt óte kele kúsheıe túsedi, óıtkeni ol barlyq memlekettik organdardyń ómir saltyna aınalady», — dep qosty ol.

Mask birde CBS—ge bergen suqbatynda Tramptyń «úlken, ádemi» salyq jáne bıýdjettik zań jobasynan kóńili qalǵanyn aıtty. Onyń aıtýynsha, bul zań Masktyń shyǵyndardy qysqartý áreketterine nuqsan keltiredi ári bıýdjet tapshylyǵynyń artýyna ákeledi.

Tramp qyzmetine kiriskennen keıin Mask «arnaıy memlekettik qyzmetker» bolyp taǵaıyndaldy, bul oǵan úkimette jylyna 130 kún jumys isteýge múmkindik berdi. 20 qańtardaǵy ulyqtaý rásiminen bastap eseptesek, mamyrdyń aıaǵynda 130 kún bitedi. Reuters aqparat kózderine silteme jasaı otyryp, Masktyń ketýin jarııalamas buryn Tramppen resmı sóılespegenin habarlady. Sonymen birge, olardyń aqparaty boıynsha, sheshim «joǵary deńgeıde» qabyldanǵan.

Sáýir aıynda Mask óz kompanııalarynda kóbirek jumys isteýdi jáne aptasyna bir nemese eki kúndi DOGE-ge arnaýdy josparlaǵanyn aıtty.