MÁSQ tólemderi boıynsha jyl basynan beri 13 óńirde 38 qylmystyq is qozǵaldy
ASTANA.KAZINFORM – Mindetti áleýmettik saqtandyrý júıesi boıynsha tekserý sharalarynyń nátıjesinde elimizdiń 13 óńirinde 38 qylmystyq is qozǵaldy, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.
Baspasóz qyzmetiniń málimetterine qaraǵanda, Memlekettik áleýmettik saqtandyrý qory (MÁSQ) mindetti áleýmettik saqtandyrý júıesi qarajatynyń zańdylyǵy men nysanaly paıdalanylýyn qamtamasyz etý baǵytyndaǵy jumystardy jalǵastyryp keledi.
Tólem taǵaıyndaý úshin usynylatyn derekterdiń durystyǵyna júrgiziletin monıtorıng aıasynda Qor jalǵan eńbek qatynastaryn rásimdeý faktilerin turaqty túrde anyqtap otyr.
Málimetter bazasyna júrgizilgen taldaý 258 kásipkerlik sýbektisiniń 4,4 myńnan astam azamatqa áleýmettik tólemderdi zańsyz alý maqsatynda jalǵan eńbek qatynastaryn rásimdegenin anyqtady.
Sot protsesteriniń qorytyndysy boıynsha 9 qylmystyq is boıynsha aıyptaý úkimderi shyǵaryldy. Sottar zańsyz shemalardy uıymdastyrǵan 12 tulǵany kináli dep tanyp, olardyń ishinde Aqtóbe, Mańǵystaý, Qyzylorda, ShQO jáne ózge de óńirlerdiń ókilderi bar. Zańsyz áreketteri úshin olar 3 jyldan 5 jylǵa deıin bas bostandyǵynan aıyrý jazasyna kesildi.
-Áleýmettik-eńbek salasyn tsıfrlandyrý bizge ártúrli aqparattyq júıelerdegi derekterdi naqty ýaqyt rejıminde ózara salystyryp tekserýge múmkindik beredi. Bul jumystyń negizgi maqsaty – áleýmettik qoldaýdyń ataýlylyǵyn qamtamasyz etý jáne júıege adal qatysýshylardyń múddesin qorǵaý. Kiristerdi jasandy túrde kóbeıtý nemese jalǵan jumyspen qamtýdy qalyptastyrý áreketteri taldaý satysynda-aq anyqtalyp, tıisti quqyqtyq baǵa beriledi, – dedi «MÁSQ» AQ Basqarma tóraǵasynyń orynbasary Marat Janybekov.
Atalǵan baqylaý sharalary eń aldymen mindetti áleýmettik saqtandyrý júıesi qarajatynyń ádil bólinýin qamtamasyz etýge jáne áleýmettik tólemderdi adal alýshylardyń quqyqtaryn qorǵaýǵa baǵyttalǵan.
MÁSQ azamattardy saq bolýǵa jáne kúmándi deldaldardyń qyzmetin paıdalanbaýǵa shaqyrady. Tólemderdi zańsyz arttyrý maqsatynda «keńesshilerge» jeke derekterdi berý tek uıymdastyrýshylar úshin ǵana emes, sondaı-aq qyzmetti alýshylar úshin de zańnamada kózdelgen jaýapkershilikke ákelýi múmkin ekeni eskertiledi.
Áleýmettik tólemderdi taǵaıyndaý tártibi boıynsha qajetti konsýltatsııalyq qyzmetter tegin túrde resmı arnalar arqyly kórsetiledi: MÁSQ fılıaldary, «Azamattarǵa arnalǵan úkimet» memlekettik korporatsııasynyń bólimsheleri, 1414 baılanys ortalyǵy, sondaı-aq Qordyń áleýmettik jelilerdegi resmı paraqshalary (Instagram, Facebook).
Aıta keteıik, bıyl Memlekettik áleýmettik saqtandyrý qorynan alǵash ret 268,6 myń adamǵa jumyssyzdyq boıynsha tólem taǵaıyndaldy.
