Mask pen Tramptyń janjalynan soń olardyń kompanııalary aktsııalarynyń quny quldyrady

ASTANA. KAZINFORM – Ilon Mask pen Donald Tramp arasyndaǵy janjal olardyń kompanııalary aktsııalarynyń baǵasynyń kúrt tómendeýine ákeldi, dep habarlaıdy DW aqparat agenttigi.

Tesla aktsııalary birneshe saǵat ishinde 15%-ǵa – 322 dollardan 275 dollarǵa deıin, al Trump Media & Technology Group aktsııalary 11%-ǵa – 21,8 dollardan 19,3 dollarǵa deıin arzandady. Tramp kompanııasy bırjada amerıkalyq prezıdenttiń ınıtsıaldarymen sáıkes keletin DJT tıkerimen belgilengen.

Mask áleýmettik jelide Tramppen «Kúnińiz jaqsy ótsin, DJT!» dep ıronııamen qoshtasty.

Janjalǵa Tramptyń Germanııa kantsleri Frıdrıh Mertspen kezdesýindegi málimdemesi sebep bolǵan.

Prezıdent Masktyń úkimettiń aýqymdy shyǵyndary týraly zań jobasyn synaýyna kóńili tolmaıtynyn bildirdi. Ol mıllıarderdiń talaby elektromobılderge beriletin sýbsıdııalardyń qysqarýymen baılanysty ekenin shamalady.

Mask buǵan qatań jaýap berdi. Ol Tramptyń sózin ótirik dep, onyń qoldaýynsyz respýblıkashyldar saılaýda jeńilip qalar edi dep málimdedi.

Mask Kill the Bill naýqanyn qaıta bastap, 1992 jylǵy keshtegi eski beıneni jarııalaý arqyly Tramptyń Djeffrı Epshteınmen boljamdy baılanysyn eske aldy. Keıinirek ol jańa saıası partııa qurýdy usynyp, X áleýmettik jelisinde saýalnama júrgizdi – qatysýshylardyń 80%-dan astamy bul ıdeıany qoldady. Sondaı-aq ol Tramptyń otstavkaǵa ketýin jáne laýazymyn vıtse-prezıdent Djeı Dı Venske tapsyrýyn qoldady.

Eske sala ketsek, Ilon Mask X áleýmettik jelisinde respýblıkashyldardyń zań jobasyn qatal synǵa alyp, onyń «naǵyz masqara» ekenin jazdy.