Mask OpenAI men Microsoft-ty sotqa berip, 134 mlrd dollarǵa deıin ótemaqy talap etti

ASTANA. KAZINFORM – Mıllıarder 79–134 mlrd dollar aralyǵynda ótemaqy talap etti, dep habarlaıdy  DW.

Amerıkalyq mıllıarder Ilon Mask OpenAI negizin qalaýshy Sem Altmanǵa, sondaı-aq OpenAI jáne Microsoft kompanııalaryna qarsy sotqa talap-aryz berdi. Іs Kalıfornııa shtatynyń Soltústik okrýginiń federaldyq aýdandyq sotynda juma kúni, 16 qańtarda tirkelgen. Іs materıaldaryna sáıkes, Masktyń OpenAI men Microsoft-qa qatysty jıyntyq qarjylyq talaptary 134 mlrd dollar dep baǵalanyp otyr.

Mask OpenAI kompanııasyn qurýǵa ózi de qatysqanyn eske saldy. Talap-aryzda OpenAI 2015 jyly jasandy ıntellekt salasyndaǵy kommertsııalyq emes zertteý startapy retinde qurylǵany kórsetilgen. Onyń negizin qalaýshylar Sem Altman men Ilon Mask bolǵan.

Mıllıarderdiń aıtýynsha, ol jobaǵa 38 mln dollar ınvestıtsııa salǵan, bul kompanııanyń bastapqy kapıtalynyń shamamen 60%-y.

Sonymen qatar Mask komanda jasaqtaýǵa qatysqanyn, iskerlik baılanystar ornatýǵa kómekteskenin jáne startaptyń damýynyń alǵashqy kezeńinde onyń bedelin nyǵaıtýǵa úles qosqanyn málimdedi.

2018 jyly Ilon Mask OpenAI dırektorlar keńesinen shyǵyp, óz jobalaryna nazar aýdardy. Qazirgi tańda olardyń biri — X áleýmettik jelisinde jumys isteıtin jáne ChatGPT-ge básekeles bolyp sanalatyn Grok atty II-chat-bot.

Mask ketkennen keıin OpenAI Microsoft korporatsııasymen yntymaqtastyq ornatyp, ınvestıtsııa tartty jáne oǵan aktsııalarynyń bir bóligin satty. Keıin kompanııa naryqqa keńinen taralǵan ChatGPT chat-botyn shyǵardy. Talapkerdiń dereginshe, bul ónim OpenAI-ǵa kópmıllıardtyq tabys ákelgen.

Talap-aryzda OpenAI kompanııasynyń qazirgi baǵasy shamamen 500 mlrd dollarǵa jetkeni aıtylǵan. Mask alynǵan tabysty zańsyz dep sanap, ony óziniń bastapqy ınvestıtsııalarymen baılanystyrady. Osyǵan baılanysty ol OpenAI-dan 65,6–109,43 mlrd dollar, al Microsoft-tan 13,3–25,06 mlrd dollar kóleminde ótemaqy talap etedi.

OpenAI kompanııasy talap-aryzdy negizsiz dep atady. Microsoft ókili de korporatsııaǵa qatysty talaptardyń dáleldermen rastalmaǵanyn málimdedi. Reuters agenttiginiń habarlaýynsha, eki kompanııa da sotqa Masktyń talaptarymen kelispeý jóninde ótinish bergen.

Sot protsesi sáýir aıynda bastalady dep kútilýde. Іs alqabılerdiń qatysýymen qaralatyn bolady.