Mask Grokıpedııanyń iske qosylǵanyn jarııalady

ASTANA. KAZINFORM – Amerıkalyq xAI tehnologııalyq kompanııasy Grokıpedııa (Grokipedia) platformasyn ázirlegenin jarııalady.

Bul týraly kompanııanyń negizin qalaýshy Ilon Mask óziniń X paraqshasynda málimdedi.

- Bul Vıkıpedııaǵa qaraǵanda keremet jetilgen dúnıe bolady. Shynyn aıtqanda, bul xAI-ǵa jetý jolyndaǵy nemese ǵalamdy túsinýge degen qadam, - dep jazdy kásipker.

Onyń aıtýynsha, Grokıpedııa qoldaný jaǵynan barlyǵyna qoljetimdi ári shekteýsiz bolady.

Bastapqy ashyq kody bar saıt qatelerdi avtomatty túrde túzetý jáne onyń mazmunynyń dáldigi men senimdiligin qamtamasyz etý úshin jasandy ıntellektini paıdalanady.

Kásipkerdiń málimdeýinshe, jańa resýrs qazirgi ýaqytta túpnusqa «Vıkıpedııada» silteme jasaýǵa tyıym salynǵan derekkózder negizinde kontent jasaıdy jáne jalpyǵa qoljetimdi bolady.

Masktyń X postynda tehnologııalyq kompanııanyń negizin qalaýshy jáne ınvestor Devıd Sakstyń da habarlamasy bar, ol Vıkıpedııany synap, ony «úmitsiz birjaqty» dep atap, «solshyl belsendiler armııasymen» basqarylatynyn jazdy.

- Jaǵdaıdy kúrdelendirip otyrǵan másele bar, ol Googl júıesinde Vıkıpedııa birinshi bolyp shyǵady jáne ol jasandy ıntellekt úlgilerin úıretýde senimdi kóz bolyp tabylady. Bul- úlken problema, - dep málimdedi Saks.

Investor bul pikirin jýyrda Taker Karlsonnyń Wikipedia-nyń negizin qalaýshy Larrı Sengerge bergen suhbatyn kórgennen keıin bildirdi, ol Karlsondy Wikipedia-nyń maquldanǵan jáne tyıym salynǵan derekkózderiniń tizimimen júrgizip ótti.

Tyıym salynǵan aqparat kózderine Fox News, The New York Post, The Federalist jáne Breitbart News kirdi.

Buǵan deıin Ilon Mask Grok 2 chat-botynyń bastapqy kodyn ashpaq ekenin jazǵan bolatynbyz.