Mask álemdegi alǵashqy trıllıonerge aınalýy múmkin

ASTANA. KAZINFORM — 6 qarashada Tesla aktsıonerleri bas dırektor Ilon Maskqa 1 trıllıon dollarlyq ótemaqy paketin taǵaıyndaýdy maquldady. Bul týraly DW habarlady. 

Ony alý úshin Mask kelesi 10 jyl ishinde óte joǵary KPI kórsetkishine jetýi tıis. Olardyń qatarynda jyl saıyn mıllıon robotaksı kommertsııalyq paıdalanýǵa engizý jáne II arqyly basqarylatyn mıllıon Optimus gýmanoıd robottaryn shyǵarý tur. Sonymen qatar, Tesla-nyń naryqtyq kapıtalızatsııasy qazirgi 1,43 trıllıonnan 8,5 trıllıon dollarǵa deıin ósýi qajet.

Alaıda, AQSh-taǵy memlekettik zeınetaqy qory CalPERS sııaqty keıbir iri ınstıtýtsıonaldy ınvestorlar Maskqa rekordtyq ótemaqy paketin berýge qarsy shyqty.

CalPERS málimetinshe, sharttar oryndalsa, Masktyń Tesla-daǵy úlesi 13%-dan 25%-ǵa deıin ósedi. Synshylardyń pikirinshe, bul mıllıarderge kompanııadaǵy oppozıtsııany basyp, onyń damý baǵytyn az qadaǵalaý arqyly anyqtaýǵa múmkindik beredi.

Berlındegi Hertie Basqarý mektebiniń etıka jáne tehnologııa professory Djoanna Braıson DW-ge bergen suhbatynda, jeke tulǵalardyń bıligi keıbir elderdiń bıliginen asyp ketken kezde, qaýipsizdik máselesi týyndaıdy degen edi. 

Ol 1929 jyly AQSh qor naryǵyndaǵy qubylmaly kezeńdi mysalǵa keltirip, ol kezde álemdegi teńsizdik qazirgi zamandaǵydaı joǵary bolǵanyn aıtty. Professordyń aıtýynsha, «bir adamǵa úlken qarajattyń berilýi haos týdyrady». 

Aıta ketelik Ilon Mask tanystyrǵan adamtektes robot Optimus qazir Tesla kórmelerinde, zaýyttarynda jáne túrli sharalarda jıi kórsetilip júr.