Másimov pen Myrzahmetov «Nur Otan» partııasynyń saıası bıýro quramynan shyǵaryldy

ASTANA. QazAqparat - Búgin «Nur Otan» partııasy Saıası keńesiniń keńeıtilgen otyrysynda bıýro quramynda ózgerister oryn aldy, dep habarlaıdy QazAqparat.

«Partııa Jarǵysyna sáıkes eger partııa múshesi quqyq qorǵaý organdaryna aýysatyn bolsa, onda ol partııadan shyǵarylady. Sondyqtan Másimov UQK tóraǵasy bolyp taǵaıyndalǵannan keıin Bıýro quramynan shyǵaryldy. Onyń ornyna Jaqsybekov qosylyp, kandıdatýrasyn  saıası keńes músheleri biraýyzdan qoldady», - dedi  otyrystan keıin BAQ ókilderine suhbat bergen «Nur Otan» partııasynyń hatshysy Qanybek Jumashev.  

Sonymen qatar ol Saıası Bıýro quramynan QR Premer-Mınıstriniń orynbasary-Aýyl sharýashylyǵy mınıstri Asqar Myrzahmetovtiń de shyǵarylǵandyǵyn aıtty.

«Ol Úkimettegi jumysyna basa nazar aýdarýy tıis boldy. Sondyqtan bıýro quramynan shyǵaryldy. Biraq, Saıası Keńeste qalady», - dedi ol.

 Qanybek Jumashev BAQ ókilderiniń Kárim Másimov «Nur Otan» partııasynyń múshesi bolyp qala bere me degen saýalyna dál qazirgi ýaqytta jaýap bere almaıtyndyǵyn aıtty.

«Ony qazir tekserý qajet. Bizde partııa músheleriniń arnaıy bazasy bar. Bul bazany árbir bastapqy partııalyq uıym qadaǵalap otyrady. Degenmen, onyń Saıası bıýro quramynan shyǵarylýy, onyń quqyq qorǵaý organdaryna jumysqa aýysýy partııa qatarynan shyǵaryldy degendi bildirse kerek», - dedi partııa hatshysy.

Onyń dereginshe, partııanyń saıası keńesine elimizdiń barlyq ókilderiniń ókilderinen jasaqtalǵan 100 adam múshe. Al saıası bıýroǵa atalǵan saıası keńesten músheler saılanady.