Másimov Qazaqstan Trıatlon federatsııasynyń prezıdenti bolyp saılandy
ASTANA. QazAqparat - Kárim Másimov Qazaqstan Trıatlon federatsııasynyń prezıdenti bolyp saılandy, dep habarlaıdy QR UQK baspasóz qyzmeti.
Onyń kandıdatýrasyn búgin ótken Federatsııa konferentsııasynda tańdady.
Konferentsııa jumysyna QR Mádenıet jáne sport mınıstri Arystanbek Muhamedıuly, sondaı-aq Federatsııa músheleri, quramanyń jattyqtyrýshylar quramy, Mádenıet jáne sport mınıstrligi men Ulttyq olımpıadalyq komıtettiń ókilderi qatysty.
K.Másimov óziniń sózinde aımaqtardaǵy sport túrleriniń damýyna basa nazar aýdara otyryp, federatsııanyń aldaǵy ýaqyttaǵy mindetterin belgiledi.
«Trıatlon - bizdiń elimizge keıin kelgen sport túri, sondyqtan onyń damýy áli bastapqy kezeńde. Bul sport túriniń josparly jáne keshendi damýyn qamtamasyz etý qajet jáne atalǵan jumys bolashaqta óz nátıjesin beredi», dedi K.Másimov.
Basqosýda uıymnyń qyzmeti týraly esebi tyńdaldy. Sonymen qatar Federatsııanyń basqarý organdarynyń jańa quramy jasaqtaldy.
