Máshhúr Júsip Kópeıulynyń ıÝNESKO tizimine engen jınaǵynda ne jazylǵan
ASTANA. KAZINFORM — Qazaq halqynyń kórnekti oıshyly, aqyn, aǵartýshy Máshhúr Júsip Kópeıulynyń sırek basylymdardan quralǵan muralar jınaǵy ıÝNESKO-nyń «Álem jady» baǵdarlamasy Azııa-Tynyq muhıty óńirlik komıtetiniń (MOWCAP) óńirlik tizimine resmı túrde engizildi. Bul sheshim Djakarta qalasynda ótken komıtet otyrysynda qabyldandy. Nomınatsııalyq ótinimdi Qazaqstan tarapy ázirlep, halyqaralyq uıymnyń qaraýyna usynǵan. Bul týraly Qazaqstan Jazýshylar odaǵy habarlady.
«Ǵylym ordasy» RMK qorynda saqtalǵan atalǵan jınaq – qazaq halqynyń tarıhy, ádebıeti men rýhanı ómirinen mol maǵlumat beretin qundy jazba mura. Máshhúr Júsip Kópeıuly óz shyǵarmalarynda HІH ǵasyrdyń ekinshi jartysy men HH ǵasyrdyń basyndaǵy qoǵamdyq ómirdi, eldiń turmys-tirshiligin, salt-dástúri men dúnıetanymyn keńinen qamtyǵan. Onyń eńbekterinde aǵartýshylyq ustanym, ǵylym men bilimge shaqyrý, ulttyq qundylyqtardy dáripteý ıdeıalary aıryqsha oryn alady.
Bul mańyzdy jetistikke qol jetkizýde «Ǵylym ordasy» RMK Ortalyq ǵylymı kitaphanasynyń mamandary eleýli eńbek atqardy. Olar nomınatsııalyq qujattardy daıyndap, sırek basylymdardyń tarıhı jáne mádenı qundylyǵyn ǵylymı turǵydan dáıekteýge, qajetti derekter men materıaldardy jınaqtaýǵa atsalysty.
Máshhúr Júsip murasynyń halyqaralyq deńgeıde moıyndalýy – qazaqtyń jazba mádenıeti men tarıhı jadyn álemge tanytý jolyndaǵy mańyzdy qadam. Sonymen birge bul sheshim ulttyq rýhanı murany saqtaý, ǵylymı turǵydan zerdeleý jáne ony keler urpaqqa jetkizý baǵytyndaǵy jumystardyń mańyzyn taǵy bir márte aıqyndaıdy.
ıÝNESKO-nyń «Álem jady» óńirlik tizimine enýi uly oıshyldyń shyǵarmashylyq murasyn halyqaralyq ǵylymı ortada keńinen nasıhattaýǵa, ony tereń zertteýge jáne álemdik mádenı mura aıasynda tanytýǵa jańa múmkindikter ashady.
Máshhúr Júsiptiń beınesi qalaı saqtalyp qalǵanyn buǵan deıin jazǵan edik.
