M.Áshimbaev Ulttyq qor týraly: Tabysymyzdan eki ese kóp aqsha jumsap otyrmyz

ASTANA. KAZINFORM – Senat tóraǵasy Máýlen Áshimbaev «Taldaý mektebiniń» úshinshi býyny ázirlegen Qazaqstannyń ornyqty damýyna arnalǵan saraptamalyq jınaqtyń tanystyrylymynda Ulttyq qor aqshasyn úzdiksiz paıdalanýdyń ekonomıkaǵa áseri týraly pikir bildirdi.

«Biz tabysymyzdan eki ese kóp aqsha jumsaımyz. Qosymsha qarajat qaıdan keledi? Ulttyq qordan jáne boryshtardan. Osy shyǵyndardyń áserinen ınflıatsııa men baǵany asqyndyryp jatyrmyz. Sáıkesinshe, Ulttyq bank te paıyzdyq mólsherlemeni kóterip otyr. Bul eldegi kásipkerlikti shektep, ekonomıkanyń damýyn tejeıdi», - dedi Senat spıkeri.

Máýlen Áshimbaev Ulttyq qorǵa túsken dollardyń bir bóligin aı saıyn teńge baǵamyn turaqtandyrý úshin satýǵa týra kelip otyrǵanyn da eske saldy.

«Problemanyń ekinshi bóligi bar. Onyń saldary tipten salmaqty bolýy múmkin. Bıýdjetke transfert bólý úshin ishki valıýta naryǵyna Ulttyq qordan dollar satý kerek. Taǵy da suranys pen usynys zańy iske qosylady. Osylaısha teńgeniń baǵasyn qoldan ósirip otyrmyz. Bul jaman emes shyǵar. Biraq onyń tıimdiligi qandaı? Artyq baǵalanǵan teńge degen – qymbat eksport, arzan ımport. ıAǵnı, bizdiń taýar óndirýshiler Qytaı men Reseıdiń, Túrkııanyń óndirýshilerine qaraǵanda tıimsiz jaǵdaıda qalady degen sóz. Baǵadan utylyp jatqandyqtan ishki óndiris pen ónerkásip óspeıdi», - dedi Senat tóraǵasy.