Mashına jasaýdy damytýdyń 5 jyldyq keshendi jospary ázirlenip jatyr

ASTANA. QazAqparat – Elimizde Mashına jasaýdy damytýdyń 5 jyldyq keshendi jospary ázirlenip jatyr. Bul týraly búgin Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Qazirgi tańda Memleket basshysynyń tapsyrmasy boıynsha Mashına jasaýdy damytýdyń 5 jyldyq keshendi jospary ázirlenýde. Ony iske asyrý mashına jasaý salasyndaǵy óndiristi 2 eseden astam arttyrýǵa, eksport kólemin shamamen 3 ese, negizgi kapıtalǵa salynatyn ınvestıtsııalardy 1,5 ese, eńbek ónimdiligin 2 ese arttyrýǵa múmkindik beredi», - dedi Premer-Mınıstr.

Úkimet basshysy memlekettik qoldaýdyń arqasynda otandyq kásiporyndar turaqty jumys oryndaryn qurý, sondaı-aq, jańa óndirister ashý jáne jumys istep turǵan kásiporyndardy jańǵyrtý arqyly eldiń áleýmettik-ekonomıkalyq damýyna óz úlesin qosa alatyndyǵyn basa aıtty.

«Indýstrııa jáne ınfraqurylymdyq damý mınıstrligi Mashına jasaýdy damytý jónindegi josparlardy oryndaý baǵytynda jumysty kúsheıtýi qajet», - dedi Álıhan Smaıylov.

Osyǵan deıin bıyl elimizde 5 myń traktor men 900 kombaın qurastyrylatyny habarlandy.