Mashına jasaý salasyndaǵy jergilikti qamtý máselesi halyq úshin ashyq bolýy tıis – Premer-Mınıstr
Bul týraly Úkimet otyrysynda QR Premer-Mınıstri Álıhan Smaıylov aıtty dep habarlaıdy QazAqparat tilshisi.
«Prezıdent otandyq avtoónerkásiptegi lokalızatsııa máselesine nazar aýdardy. Búgingi tańda avtomobıl salasy mashına jasaý men bútindeı óńdeý ónerkásibin damytýdyń negizgi draıverine aınaldy. Sondyqtan bul saladaǵy jergilikti qamtý máselesi halyq úshin ashyq ári anyq bolýy tıis», - dedi Álıhan Smaıylov.
Osy rette Úkimet basshysy Indýstrııa mınıstrligine bir apta ishinde avtoónerkásip kásiporyndarynyń óndiristik alańdaryna baryp-kórý kestesin belgileýdi tapsyrdy.
«Baratyndardyń qataryna mindetti túrde sarapshylar men qoǵam ókilderin qosý qajet. Sonymen birge, jalpy halyq úshin otandyq avtoqurastyrý kásiporyndarynyń qyzmeti týraly arnaıy beıne-materıaldar daıyndap, BAQ arqyly taratý kerek», - dedi Premer-Mınıstr.
