Mashına jasaý salasyn damytýdyń keshendi jospary ázirlenip jatyr

ASTANA. QazAqparat - Qazaqstannyń mashına jasaý salasyn damytýdyń keshendi jospary ázirlenýde. Bul týraly Májilis depýtattarynyń resmı saýalyna jaýap bergen QR Premer-Mınıstri Asqar Mamın aıtty, dep habarlaıdy QazAqparat tilshisi.

«Qazirgi ýaqytta 2019-2030 jyldarǵa arnalǵan Qazaqstan Respýblıkasyndaǵy mashına jasaý salasyn damytýdyń keshendi jospary ázirlenip jatyr. Keshendi jospar mashına jasaýdy, onyń ishinde aýyl sharýashylyǵy mashınasyn jasaýdy damytýǵa baǵyttalǵan túrli sharalardy qamtıdy. 2018 jyldyń 20-21 qyrkúıeginde ótken Qazaqstan mashına jasaýshylarynyń VI forýmynda keshendi jospar jobasy talqylanǵan bolatyn. Búginde keshendi jospar jobasy múddeli memlekettik organdar men uıymdardyń kelisimine joldanǵan», - dedi Asqar Mamın.

Aıta keteıik, 13 aqpanda Májilistegi «Aq jol» partııasy fraktsııasynyń depýtattary sol kezdegi Premer-Mınıstr Baqytjan Saǵyntaevqa resmı saýalmen júginip, otandyq aýyl sharýashylyǵy mashınasyn jasaýdy damytýǵa baǵyttalǵan jospar túzýdi usynǵan edi. Depýtattardyń dereginshe, ótken jyly otandyq arnaıy aýyl sharýashylyǵy tehnıkasyn shyǵaratyn kásiporyndar 24 mlrd teńgeniń ónimin óndirgen. Alaıda, syrttan keletin ımport kólemi 100 mlrd teńgege jýyqtap otyr.

Buǵan qosa, elimizdegi jyldyq jalpy óndiristik qýaty 2 300 traktor men 1 100 kombaın shyǵarýǵa qaýqarly 77 kásiporyn 50 paıyzdyq júktememen ǵana jumys istep tur.