Mashına jasaý salasynda óndiris kólemi 5,7 trln teńgeden asty
ASTANA. KAZINFORM – Byltyr kólik óndirý 18%-ǵa artqan. Bul jóninde QR Ónerkásip jáne qurylys vıtse-mınıstri Oljas Saparbekov Qazaqstan mashına jasaýshylarynyń XIII forýmynda málimdedi.
Onyń sózinshe, mashına jasaý salasy ekonomıkanyń negizgi tireginiń biri bolyp qala beredi. Bul sektorǵa óńdeý ónerkásibiniń 20%-y tıesili.
– 2025 jyldyń qorytyndysy boıynsha sala turaqty oń dınamıka kórsetti: óndiris kólemi shamamen 18%-ǵa ósip, 5,7 trln teńgeden asty. Avtomobıl jasaý, temirjol jáne elektrotehnıkalyq mashına jasaý sııaqty segmentter eleýli úles qosty, - dedi O. Saparbekov.
Sondaı-aq mamandar forýmda mashına jasaý salasyna zamanaýı tehnologııalardy engizý, quramdas bólshekter óndirisin damytý, otandyq ónimniń básekege qabilettiligin arttyrý t.b. máselelerdi talqylady. Olardyń aıtýynsha, eksporttyq áleýetti kúsheıtýge de basymdyq beriledi.
Budan bólek sarapshylar Qazaqstan óńdeý ónerkásibine ınvestıtsııa tartý saıasatyn júıeli túrde júzege asyryp jatqanyn atap ótti.
Alaıda paneldik sessııanyń moderatory bolǵan QR Parlamenti Májilisiniń depýtaty Azat Perýashev ınvestıtsııaǵa ǵana senip otyra berýge bolmaıtynyn jetkizdi.
– Uzaq merzimdi nátıjege tek qarjylyq ınvestıtsııalar esebinen ǵana emes, sonymen qatar tehnologııalyq bazany damytý arqyly da qol jetkizýge bolady. Birlesip jumys isteýge daıyn tehnologııalar men seriktesterdi tartý mańyzdy. Bul maqsatta bilim transferin, ǵylymı-zertteý jáne konstrýktorlyq ortalyqtar qurý kerek. Sonymen birge kúrdeli jabdyqtardy elimizde óndirý jáne mamandar daıarlaý da – ózekti máseleler, - dedi A. Perýashev.
Aıta keteıik Qazaqstan mashına jasaýshylarynyń XIII forýmy 3 sáýirge deıin jalǵasady.
Al buǵan deıin elimizde mashına jasaý salasy qalaı damyp jatqanyn jazǵanbyz.
