Mashına jasaý salasynda maman tapshy
ASTANA. KAZINFORM — Búgin mashına jasaýshy jumysshylardyń kásibı merekesi. Bul baǵytta elimizde 131 myńnan astam adam eńbek etedi.
Kazinform tilshisi mashına jasaý salasynda 20 jyldyq tájirıbesi bar mamanmen suhbattasyp qaıtty.
– Bul salany ákem tańdaǵan. Sol kisiniń tańdaýy boıynsha men de ary qaraı alyp kettim. Ókingen emespin. Kerisinshe, bastaǵan tirlikti sońyna deıin alyp barý kerek. 2005 jyly Navoı oblysy Úshqudyq qalasyndaǵy kásiptik taý kolledjinde metall óńdeý sheberi mamandyǵy boıynsha bilim aldym. Bitire sala jumysqa kirisip kettim. Buǵan deıin ár óńirdegi zaýyttarda jumys istegenmin. 2011 jyldan beri lokomotıv qurastyratyn zaýytta eńbek etip, nápaqamdy taýyp júrmin. Qazir qondyrǵy operatorymyn, – deıdi Jánibek Maqsat.
Jumysshy elge qyzmet etý azamattyq boryshymyz deıdi.
– Elorda bolǵannan keıin jastardyń keleshegi dep osynda kelgen edik. Elordamyzdy kórkeıteıik, bala-shaǵamyz osynda óssin degen nıet boldy. Eldiń damýyna úles qossam deımin. Solaı osy jumysqa ornalastym. Kásiporyn alǵash kelgen jyly jas maman retinde úı bergen. Sonda turamyz. Ol úıge kirgende eki balam bolǵan. Qazir tórteý, – deıdi ol.
Jánibek Maqsat zaýyttaǵy jumysyn túsindirdi.
– Men temir jonatyn 3 qondyrǵymen jumys isteımin. Qondyrǵylar tolyǵymen avtomattandyrylǵan. Temirdi qoıyp, koordınatyn belgileseńiz jetkilikti. Bárin ózi istep beredi. Ózimniń jumysyma kóńilim tolady. Olaı bolmasa, munda qyzmet etpes edim, – deıdi maman.
Óndiris salasyna maman tapshy degendi alǵash ret estip jatqan joqpyz. Keıipkerimiz sóz barysynda jastardyń jeńil jumysqa jıi moıyn buratynyn aıtyp qaldy.
– Jastar qatty úırengisi kelmeıdi me, bilmedim. Bizdiń mamandyq tapshy. Bul salany kóp jastar oqyǵanymen, basym bóligi jeńil jaqqa ketip qalyp jatyr. Oqyp kelgenderdiń kóbi jumysty aýyrsynady. Al shyn máninde bul salanyń jaqsy jemisi bar. Biz sekildi mamandar kez kelgen mekemege jumysqa turyp kete alady. Eger mashına jasaý salasynda maman tapshylyǵy jalǵasa berse, kadrlardy shetelden alyp kelýge týra keledi. Bul óndiristiń damýyn kesheýildetedi, – deıdi jumysshy.
Keıipkerimiz óz balalaryn da osy salaǵa tárbıelep júr.
– Ózimniń de balalarym ósip kele jatyr. Olarǵa da osy baǵytta bar bilgenimdi urysyp turyp úıretip jatyrmyn. Bireýdiń balasyna ursa almaısyń ǵoı. Munda jastardyń jumys isteýine jaqsy jaǵdaı jasalǵan. Sol úshin jastar kóptep kelse eken deımiz. Men jastardy qoldaımyn. Qazir kelip, úırenip jatqan jastar da bar. Ózim 15 shaqty shákirt tárbıeledim. Qazir zaýytta, osy aınalada jumys istep júrgenderi de bar. Talpynysy bar, biraq kishkene qıyndaý. Sonda da úıretýge bolady, – deıdi Jánibek Maqsat.
Tájirıbeli maman jastardy mashına jasaý salasyna qyzyqtyrý úshin ozyq tehnologııalardy kóptep tartý kerek degen pikir bildirdi.
– Jas mamandardy ustap qalý úshin ozyq tehnologııalardy qoldaný kerek. Zaýyttar jańa stanoktarmen jumys isteýi tıis. Sol kezde jastardyń qyzyǵýshylyǵy kóbeıedi dep oılaımyn, – dedi ol sóz sońynda.
Jánibek Maqsat jumys isteıtin zaýytta ásirese tehnıkalyq mamandar tapshy.
— Kóbinese tehnıkalyq mamandar óte qajet. Dánegerleýshi, stanoktarǵa operatorlar, masterler, ınjenerler jetispeıdi. Jastar jeńil jumysqa qaraı aýysyp ketip jatyr. Bulaı jalǵasa berse, elimizde óndiris toqtap, lokomotıvterdi shetelden satyp alatyn jaǵdaıǵa jetemiz, - deıdi zaýyt qyzmetkeri Raýan Dóńsebaev.
Aıta keteıik, elimizde sońǵy 10 jylda mashına jasaý salasy aıtarlyqtaı ózgeristerge ushyrady.