Mashına jasaý salasyna quıylǵan ınvestıtsııa kólemi artyp, 376 mlrd teńgege jetti
ASTANA. KAZINFORM – Atalǵan kórsetkishtiń ósýi bıznestiń memlekettik saıasatqa degen senimin kórsetedi. Bul jóninde QR Premer-mınıstri Oljas Bektenov Qazaqstan mashına jasaýshylarynyń XIII forýmynda málimdedi.
Onyń sózinshe, búginde bul sektor jahandyq kúrdeli ahýalǵa qaramastan, ulttyq ekonomıkamyzdyń tuǵyryna aınaldy.
– Ótken jyldyń qorytyndysy boıynsha óndiris kólemi 5,7 trln teńgege jetip, naqty kólem ındeksi shamamen 13%-ǵa ósti. Keıingi bes jylda eksport kólemi eki eseden asyp, 1,3 mlrd dollardan 3,1 mlrd dollarǵa deıin artty. Bul oraıda, syrtqa shyǵarylatyn ónimniń sanymen qatar, sapasy da joǵarylap jatyr. Qazaqstandyq óndirýshiler eksporttyq naryqtardy senimdi túrde baǵyndyra bastady. Atalǵan kórsetkishterdiń ar jaǵynda elimiz boıynsha 4 myń kásiporynda jumys isteıtin 130 myńnan astam bilikti mamannyń qajyrly eńbegi tur, - dedi O. Bektenov.
Sondaı-aq ol ınvestıtsııa kólemi de artyp kele jatqanyn atap ótti.
– Investıtsııalar da ósip keledi. Negizgi kapıtalǵa salynǵan ınvestıtsııalar úshten birge artyp, shamamen 376 mlrd teńgege jetti. Bul osy baǵytta júrgizilip jatqan memlekettik saıasatqa degen bıznestiń senimin kórsetedi jáne ónerkásipti odan ári jańǵyrtýǵa negiz bolady, - dedi Premer-mınıstr.
Aıta keteıik buǵan deıin aýyl sharýashylyǵy mashınasyn jasaý salasynda oń qarqyn bar ekenin jazǵanbyz.
