Mashına jasaý salasyna kórsetiletin memlekettik qoldaýdyń baǵyty ózgeredi - Prezıdent
Qazaqstan mashına jasaý salasyna kórsetiletin memlekettik qoldaý sharasynyń baǵytyn ózgertedi. Bul týraly Qazaqstan men Reseıdiń XIX Óńiraralyq yntymaqtastyq forýmynda Memleket basshysy Qasym-Jomart Toqaev aıtty, dep habarlaıdy Kazinform.
«Reseılik jetekshi «Rosselmash» kompanııasynyń, Peterbýrg traktor zaýytynyń traktorlary men kombaındaryn qurastyrý óndirisi tabysty júzege asyrylýda. Qazaqstandyq fermerler arasynda Vektor, Kırovets, Akros syndy modelder úlken suranysqa ıe. Qazaqstan fermerlerge jeńildikpen nesıe jáne lızıng berý arqyly aýyl sharýashylyǵy tehnıkalaryna suranysty qamtamasyz etip otyr», - dedi Qasym-Jomart Toqaev.
Qasym-Jomart Toqaev taıaý arada Qazaqstannyń mashına jasaý salasyna kórsetiletin memlekettik qoldaý sharasynyń baǵyty kezeń-kezeńmen ózgeretinin aıtty. Aldaǵy ýaqytta tehnıkany iri bólshekterden ǵana emes, birte-birte usaq bólshekten qurastyratyn aralas óndiriske basymdyq beriletinin jetkizdi.
Bul rette Prezıdent eńbek ónimdiligine, ımporttalatyn qosalqy bólshekterdiń jergilikti óndirisin jolǵa qoıýǵa jáne ónimdi jumys oryndaryn ashýǵa basa mán berý mańyzdy ekenin atap ótti.
