Mashına jasaý salasyn damytýdyń basymdyqtary aıqyndaldy
ASTANA. KAZINFORM — Premer-mınıstrdiń birinshi orynbasary Roman Sklıardyń tóraǵalyǵymen Qazaqstan mashına jasaýshylar odaǵynyń Úılestirý keńesiniń kezekti otyrysy ótti.
Otyrystyń jumysyna Parlament Senatynyń Tóraǵasy Máýlen Áshimbaev, «Báıterek» Ulttyq basqarýshy holdıngi» AQ basqarma tóraǵasy Rýstam Qaraǵoıshın, «Allıýr kompanııalar toby» AQ dırektorlar keńesiniń tóraǵasy Andreı Lavrentev, memlekettik organdardyń, ulttyq kompanııalardyń jáne otandyq jetekshi kásiporyndardyń basshylary qatysty.
Basqosý barysynda mashına jasaý salasyn damytýǵa qatysty júıeli máseleler, 2028 jylǵa deıingi mashına jasaýdy damytý jónindegi Keshendi jospardyń júzege asyrylý barysy, sondaı-aq osy jyly Odaq atqarǵan jumystyń qorytyndylary qaraldy.
Parlament Senatynyń Tóraǵasy Máýlen Áshimbaev óńirlerde otandyq mashına jasaýdy damytý úshin senimdi negiz qalyptasqanyn, sondaı-aq bıznes, Parlament pen Úkimet arasyndaǵy tıimdi qarym-qatynas salanyń odan ári qarqyndy damýyn qamtamasyz etetinin atap ótti.
Odaqtyń basqarma tóraǵasy Meıram Pishembaev baıandama jasady. Ol 2023–2024 jyldary Memleket basshysynyń Qazaqstan halqyna joldaýlarynda berilgen tapsyrmalardyń oryndalýy týraly baıandap, bıyl Úkimet jáne Parlamentpen birlesip óńdeýshi ónerkásipti damytýǵa baǵyttalǵan mańyzdy zańnamalyq ózgerister qabyldanǵanyn atap ótti. Olarǵa ishki eldik qundylyqty damytý baǵdarlamalaryn bekitý men offteık-kelisimsharttardy jasasý, sondaı-aq ımporttalatyn jabdyqtar men materıaldarǵa qosylǵan qun salyǵyn 1 jylǵa deıin keıinge qaldyrý normalary kiredi.
Jıyn barysynda ónerkásiptik robottardy jedel engizý jáne óndiristi tsıfrlandyrý máselelerine erekshe nazar aýdaryldy. Sondaı-aq kásiporyndardy otandyq shıkizatpen qamtamasyz etý, ishki eldik qundylyq baǵdarlamalaryn bekitý jónindegi mindettemelerdi zańnamalyq turǵyda bekitý jáne qazaqstandyq taýar óndirýshilerdiń tizilimin engizý máseleleri de qaraldy.
Roman Sklıar memlekettik organdar men bıznestiń úılesimdi jumysy salanyń turaqty ósýi men qoıylǵan mindetterdiń oryndalýy úshin asa mańyzdy ekenin atap ótti.
Otyrys qorytyndysy boıynsha keńes músheleriniń barlyq usynysy ári qaraı qaraý jáne sheshim qabyldaý úshin Úkimetke jáne tıisti memlekettik organdarǵa usynylady.
Eske sala keteıik, buǵan deıin Túrkistan oblysynda ylǵaldy kóp qajet etetin daqyldardy egý lımıtteri qaıta qaralǵanyn jazǵan edik.