Mashına jasaý salasyn damytý boıynsha aýqymdy josparlarymyz bar — Prezıdent
ASTANA. KAZINFORM — Elordada Qazaqstan mashına jasaýshylarynyń XIІ forýmy bastaldy. Forýmnyń ashylýynda Premer-mınıstr Oljas Bektenov Qazaqstan Prezıdenti Qasym-Jomart Toqaevtyń quttyqtaý sózin oqyp berdi.
— Sizderdi Qazaqstan mashına jasaýshylarynyń XII forýmynyń ashylýymen shyn júrekten quttyqtaımyn. Bul — mashına jasaý salasynyń bilikti mamandarynyń kezdesýi, otandyq bıznes ókilderi úshin jańa múmkindikter alańy. Qazir Qazaqstandaǵy mashına jasaý salasynyń úlesi 13-ten 19 protsentke deıin jetip otyr, jalpy kólemi 4,1 mıllıonǵa jetti jáne eksport kólemi de artyp keledi. Qazir elimizge aýyl sharýashylyǵy tehnıkasymen qamtamasyz etetin jańa kompanııalar kelip jatyr. Bıyl mashına jasaý salasyn damytý boıynsha aýqymdy josparlarymyz bar. Bul bizdiń jemisti eńbegimizdiń nátıjesi. Mashına jasaý kólemin arttyrý, ozyq tehnologııalardy, sonyń ishinde jasandy ıntellektini qoldaný — bizdiń basty mindetimiz. Sondaı-aq jumysshylar úshin qajetti eńbek jaǵdaılaryn jasaý da asa mańyzdy. Qazirgi jahandyq ózgerister men daǵdarys jaǵdaılarynda jańa múmkindikter ashylyp keledi. Mashına jasaý salasy Qazaqstannyń qarqyndy damýyna óz úlesin qosýǵa daıyn. Mashına jasaýshylar forýmynyń tabysty ótýine tilektespin, — dep jazylǵan Prezıdent quttyqtaýynda.
Aıta keteıik, Qazaqstan mashına jasaýshylarynyń XII forýmy 24-25 sáýir kúnderi Astanada ótedi. Forým otandyq mashına jasaý salasyn odan ári damytýǵa baǵyttalǵan usynystar men praktıkalyq usynymdar ázirleýdi kózdeıdi.
Sondaı-aq, elordada mashına jasaý jáne metall óńdeý boıynsha «Kazakhstan Machinery Fair 2024» halyqaralyq mamandandyrylǵan kórmesi ótip jatyr.
Buǵan deıin otandyq mashına jasaýshylarǵa shıkizat qunyn tómendetý usynylǵan edi.