Máshhúr Júsiptiń qoljazbalary men jeke zattary kórmege qoıyldy
ASTANA. QazAqparat - Pavlodarda Buqar Jyraý atyndaǵy ádebıet jáne óner mýzeıinde «Ǵulama taǵylymy» atty taqyryptyq kórme ashyldy, dep habarlaıdy pavlodarnews.kz.
Saltanatty ashylýǵa kelgen oblystyq mádenıet, arhıvter jáne qujattama basqarmasynyń basshysy Ardaq Raıymbekov bul ǵulamanyń mereıtoıyna arnalǵan sharalardyń bastaýy ekenin atap ótti.
«Atalmysh kórme Máshhúr Júsiptiń 160 jyldyǵyna arnalyp otyr, - dedi Ardaq Raıymbekov. - Budan da basqa osy jyly tamyz aıynda respýblıkalyq ǵylymı-praktıkalyq konferentsııa uıymdastyrylady. Baıanaýyldyń ózinde aıtys, konferentsııa, Máshhúr oqýlary jáne taǵy basqa sharalar ótkiziledi».
QR BǴM ǴK «Ǵylym ordasy» ǵylymı kitaphana meńgerýshisi Qarlyǵash Qaımaqbaeva kórmege ákelingen jádigerler jóninde baıandady.
«Óz kózderińizben kórsin dep kóne 25 qoljazbasyn ákelip otyrmyz, - dedi Qarlyǵash Qaımaqbaeva. - Keıbir jazbalar 500 betten asady. 1907 jyly Qazan qalasynda shyqqan, alaıda, tsenzýradan ótpeı qalǵan jáne sol úshin Máshhúr Júsip Qazaqstannyń batys jaǵyna ketýge týra kelgen úsh kitaby bar. «Hal ahýal», «Saryarqanyń kimdiki ekeni» jáne «Tirshilik» dep atalatyn sol kitaptardy da ala keldik. Táýelsizdik jyldarynda da jaryq kórgen kitaptar ákelindi. Osy eńbekterdiń elektrondy nusqasyn mýzeı qoryna syıǵa tartpaqpyz».
Aıta keteıik, kóne qoljazbalarmen birge Eskeldi shatqalyndaǵy memorıaldyq mýzeıinen ákelingen aqynnyń jeke zattary - quran, mustek qobdıshasymen, jez legen, kise belbeý, ámııan, shaqshalary, kózildirigi kórmege qoıylǵan.
