«Máshhúr Júsip oqýlary» baıqaýy ótedi
ASTANA. 17 tamyz. QazAqparat - Pavlodar oblystyq «Máshhúr Júsip» ortalyq meshiti men Pavlodar qalalyq mádenıet jáne tilderdi damytý bólimi birlesip, aldaǵy qyrkúıek aıynyń sońyna qaraı qalalyq «Máshhúr Júsip oqýlary» baıqaýyn uıymdastyryp ótkizetin bolyp ýaǵdalasty.
QMDB málimetinshe, atalmysh taraptardyń kelisimi boıynsha «Máshhúr Júsip» oqýlarynyń qalalyq alǵashqy baıqaýyn eki satyly júrgizip, osy sharaǵa ketetin qarajatty bólisip shyǵarady. Konkýrsta Máshhúr Júsip óleńderin jatqa oqý, «Árkim ózin tanysa sonda Táńirisin tanıdy» kórsetilimi boıynsha usynylǵan shyǵarmalar mazmunyna taldaý jasaý, «Óz ónerim - ózime altyn taǵym» kórsetilimi boıynsha qatysýshylar Máshhúr Júsipke jazǵan arnaý óleńin oqıdy. Oǵan qosa qatysýshylar arnaıy daıyndalǵan suraqtarǵa jaýap beredi. Júldeli oryn ıelengenderge baǵaly syılyqtar tabys etiledi.
Sonymen qatar bul konkýrsty kelesi jyldan bastap oblystyq, respýblıkalyq deńgeılerde uıymdastyryp ótkizý kózdelip otyr. Baıqaýdyń negizgi maqsaty - dala ǵulamasy Máshhúr Júsip Kópeıulynyń muralary men shyǵarmashylyq ómirbaıanyn jastarǵa nasıhattaý arqyly olardyń ómirine ımandylyq, otanshyldyq tárbıe qalyptastyrý bolyp tabylady.
Qatysýǵa nıet etýshiler www.pvlmeshit.kz saıty arqyly konkýrs erejesimen tanysa alady.
