Máshhúr Júsip, Musa Shormanuly jáne Buqar jyraý kesenelerin jalǵaıtyn jol qashan jóndeledi
«Úkimet Qazaqstan Respýblıkasynyń týrıstendirý kartasynyń basym aýmaqtarynyń úzdik ondyǵyna kiretin Baıanaýyl kýrorttyq aımaǵyn tanymal etý jáne ilgeriletý boıynsha turaqty jumys júrgizýde. Ózderińizge belgili, Máshhúr Júsip, Musa Shormanuly jáne Buqar jyraý kesenelerin jalǵaıtyn avtomobıl jolynyń jalpy uzyndyǵy - 114 shaqyrym. Máshhúr Júsip kesenesinen Musa Shormanuly kesenesine deıingi avtomobıl jolynyń uzyndyǵy 84, onyń ishinde asfalt tóselgeni 73 jáne qıyrshyq tas tóselgeni 11 shaqyrymdy quraıdy. Bıyl qıyrshyq tas tóselgen jerlerge asfaltbeton tósep, uzyndyǵy 11 shaqyrym ýchaskeni ortasha jóndeý josparlanǵan. Jobanyń jalpy quny - 365 mln teńge» delingen Premer-Mınıstrdiń jaýabynda.
Úkimet basshysy jaýabyndaǵy málimetke sáıkes, respýblıkalyq bıýdjetti birinshi naqtylaý kezinde jobany iske asyrýǵa 124,3 mln teńge mólsherinde aldyn ala qarajat qoldaý tapty.
Sondaı-aq Pavlodar oblysynyń ákimdigi jergilikti bıýdjetten 241,3 mln teńge bólýdi josparlap otyr.
«Musa Shormanuly kesenesinen Imantaı jáne Álıma Sátbaevtar mazaryna deıingi (10 shaqyrym), odan ári Kemal Aqyshevtyń týǵan jerine deıingi (10 shaqyrym) jáne Buqar jyraý kesenesine deıingi (10 shaqyrym) avtomobıl jolynyń uzyndyǵy 30 shaqyrymdy quraıdy jáne jol tósemi joq. Búgingi kúni Pavlodar jáne Qaraǵandy oblystarynyń ákimdikteri joǵaryda kórsetilgen ýchaske qurylysyna jobalyq-smetalyq qujattamany ázirleýde. Ol osy jyldyń úshinshi toqsanynda aıaqtalmaq. QR Indýstrııa jáne ınfraqurylymdyq damý mınıstrligi qurylys jáne turǵyn úı-kommýnaldyq sharýashylyq isteri komıtetiniń «Memlekettik vedomstvoaralyq jobalardyń saraptamasy» respýblıkalyq memlekettik kásipornynyń oń qorytyndysyn alǵannan keıin Úkimet joǵaryda kórsetilgen jobalardy qarjylandyrý máselesin qaraıdy», - dep naqtylanǵan Asqar Mamınniń jaýabynda.
