Mashat asýynda júk kóligi jol apatyna ushyrap, Taraz — Shymkent trassasyn jaýyp tastady

ShYMKENT. KAZINFORM- Júk kólikteriniń qozǵalysyna ýaqytsha shekteý engizildi. Jol 5 maýsym kúni saǵat 05:00–de qaıta ashylady dep josparlanyp otyr. 

Túrkistan oblysy Túlkibas aýdanyna qarasty Keltemashat aýyly mańyndaǵy Taraz — Shymkent avtojolynyń 653-shaqyrymynda Shacman markaly júk kóligi jol-apatyna ushyrady. Salmaǵy 124,8 tonna, ólshemderi belgilengen normalardan asatyn kólik eki baǵyttaǵy joldy tolyq jaýyp tastaǵan.

— Júk kóligi «RF shekarasy (Jaısan ótkizý beketi) — Mártók — Aqtóbe (soltústik aınalma joly) — Qarabutaq — Qyzylorda — Shymkent (soltústik aınalma joly) — Taraz (aınalma jol) — Qordaı — Almaty — Qorǵas — Qytaı shekarasy (Nur Joly ótkizý beketi)» baǵytymen júrip kele jatqan, — dep málimdedi «QazAvtoJol» UK» AQ.

Oqıǵaǵa Mashat asýynda tejegish júıesiniń isten shyǵýy sebep bolǵan. Júrgizýshi kólikke ıe bola almaı, joldy jaýyp, 200 metrden astam qorshaýdy búldirgen. Apattan zardap shekkender joq.

Qazirgi tańda kólik qozǵalysy bir jolaqpen júzege asyrylyp jatyr, oqıǵa ornynda jol qyzmetteri jumys istep jatyr.

«QazAvtoJol» UK» AQ fılıalynyń málimetinshe, bul kólikke jol júrýge ruqsat berilmegen. Onyń parametrleri normatıvten asqan (eni — 5,2 m, bıiktigi — 5,2 m).

«QazAvtoJol» UK» AQ tasymaldaýshylar men júrgizýshilerdi iri kólemdi jáne aýyr salmaqty júkterdi tasymaldaý erejelerin qatań saqtaýǵa, tıisti ruqsattardy ýaqtyly alýǵa, sondaı-aq kólik quraldarynyń tehnıkalyq jaı-kúıin baqylaýǵa shaqyrady. 

— Talaptardy elemeý zańnamany buzyp qana qoımaı, basqa da jol paıdalanýshylarǵa qaýip tóndirýi múmkin. Mundaı jaǵdaıda jol qozǵalysynyń basqa qatysýshylary zardap shegedi, — delingen «QazAvtoJol» UK» AQ málimdemesinde.

Aıta keteıik, budan buryn Shymkentte taksıdi taspen urǵan boıjetken qamaýǵa alynǵanyn jazǵan bolatynbyz.