«Masha men aıý» jáne LGBT sımvolıkasy bar oıynshyqtar: Depýtat balabaqshalardaǵy tárbıeni synǵa aldy
ASTANA. KAZINFORM – Elimizdegi balabaqshalarda ulttyq tárbıe baǵdarlamasynyń aqsap turǵany jáne búldirshinderdiń otandyq ónimderdiń ornyna sheteldik mýltfılmderdi kórýge májbúr ekeni Májiliste ótken brıfıngte synǵa alyndy. Parlament Májilisiniń depýtaty Rınat Zaıtov balabaqshalardaǵy oıynshyqtar, ádebıetter men otandyq anımatsııanyń sapasyna qatysty saýal qoıdy.
Depýtat búginde mektepke deıingi uıymdarda ulttyq qundylyqtardy dáripteıtin baǵdarlamalardyń kórinbeıtinin, balalardyń jattaıtyn taqpaqtary men oqıtyn ádebıetteriniń mazmuny taıaz ekenin alǵa tartty.
Sondaı-aq keıbir balabaqshalarda balanyń psıhologııasyna keri áser etetin, LGBT sımvolıkasy bar oıynshyqtardyń da kezdesetinin ashyp aıtty.
– Qashan barsań balabaqshada «Masha men aıý» (Masha ı medved) men «Fıksıkı» qosylyp turady. Jalpy ulttyq tárbıe beretin balabaqshada baǵdarlama bar ma ózi? Naqty suraq qoıaıyn, ulttyq tárbıe berýge arnalǵan qandaı mýltıplıkatsııa bar, olar Oqý-aǵartý mınıstrliginiń tapsyrysymen, álde konsýltatsııasymen ázirlene me? Qandaı kórnekilik quraldar bar? Qudaı betin ary qylsyn, kóp balabaqshada oıynshyqtardy qarasań LGBT sımvolıkasymen turady. Bálkim sizder baıqamaıtyn shyǵarsyzdar, ol da qaýipti, – dep surady ol.
Bul saýalǵa Oqý-aǵartý vıtse-mınıstri Shynar Aqparova jaýap berdi. Onyń aıtýynsha, mınıstrlik tarapynan arnaıy úlgilik baǵdarlama men kórnekilik quraldardyń tizbesi bekitilgenin jáne bul qujattarda ulttyq qundylyqtardyń bári eskerilgenin aıtty.
– Oqý mınıstrligimen oqý baǵdarlamasynyń úlgilik baǵdarlamasy bekitilgen. Ulttyq tárbıe, barlyq qundylyqtar sol baǵdarlamada aıqyndalǵan. 216-buıryqta kórnekilik oqý keshenderiniń bekitilgen tizbesi bar. Bul tizbede jergilikti atqarýshy organdarǵa osy mektepke deıingi uıymdarǵa ádistemelik oqý keshenin alý quzyreti berilgen. Kórnekilik quraldarǵa 70-buıryqta tizimderi bekitilgen. Soǵan sáıkes barlyq bilim berý uıymdarynyń qyzmeti 70 paıyzǵa sáıkes bolýy kerek, – dep túsindirdi vıtse-mınıstr.
Depýtat mınıstrlikten qurǵaq buıryqtardyń nómirin emes, balabaqshadaǵy naqty ádebıetter men mýltfılmderdiń ataýyn talap etti. Buǵan vıtse-mınıstr balabaqshada qoldanylatyn quraldardyń sıpatyn túsindirip, anımatsııa boıynsha jaýapty jazbasha joldaıtynyn málimdedi.
– Ulttyq tárbıe qundylyqtarynyń mindeti osy oqý baǵdarlamasynda aıqyndalǵan. Kórnekilik quraldary ár jas erekshelikterine qaraı bólinedi. Mysaly, tsıferblat saǵaty, ártúrli jazýshylardyń portretteri bolýy kerek ne bolmasa matematıkaǵa baılanysty fıgýralar bolýy tıis. Sonyń barlyǵynyń tizbesi bizde 70-buıryqta anyqtalǵan. Soǵan baılanysty barlyq balabaqsha qamtamasyz etýge mindetti. Al mýltfılmge qatysty aqparatty men jazbasha ǵana bere alamyn, – dep túıindedi Shynar Aqparova.
Eske sala keteıik, Memleket basshysy 2025 jyldyń jeltoqsanynda LGBT nasıhatyna tyıym salatyn zańǵa qol qoıǵan edi.
