Máseleni retteımiz – Roman Sklıar Prezıdenttiń «ushaq bıleti qymbat» degen syny jaıly
«Meniń oıymsha, biz bul máseleni retteımiz. Alaıda halyqaralyq tájirıbe kórsetip otyrǵandaı, saparyńyzdy aldyn ala josparlap, bıletti erterek satyp alǵan jón. Sol kezde bılet baǵasy da tıisinshe arzanǵa túsedi. Al biz sapar aldynda birneshe kún buryn ǵana bıletti alsaq, onda álbette, bılet qymbatyraq bolady», - dedi Roman Sklıar Úkimet otyrysynan keıin tilshilerdiń suraǵyna jaýap bere otyryp.
Mınıstrdiń aıtýynsha, qazirgi tańda Energetıka mınıstrligi 100 paıyz áýe kompanııalaryn avıakerosınmen qamtamasyz etip otyr.
«Biz avıakerosındi endi shetelden satyp almaımyz. Bizdiń zaýyttar ony jetkilikti dárejede óndirýde. Baǵany retteý jumysy jaqyn arada sheshimin tabady. Bizdiń iri áýe kompanııalary avıaotyndy tikeleı treıderlerden deldalsyz satyp alady. Al biz arqyly ótetin tranzıttik áýe kompanııalary avıaotyndy áýejaılardan satyp alyp jatyr. Mine, osy rette deldaldardyń sany men baǵasy boıynsha (...) UEM-men, tabıǵı monopolııalardy retteý komıtetimen biz bul máselemen belsendi túrde aınalysamyz», - dedi Roman Sklıar.
Eske sala ketsek, Qazaqstan halqyna kúni keshe Joldaýyn jarııalaǵan Prezıdent Qasym-Jomart Toqaev Qazaqstanda ushaq bıletiniń qymbat bolýyna qatysty syn aıtqan bolatyn.
«Máselen, nelikten negizgi avıatasymaldaýshynyń avıabıletteri eýropalyq baǵaǵa qaraǵanda 30 paıyzǵa deıin qymbat? Bizdiń áýejaılardyń qyzmet baǵalary nelikten joǵary? Nege sheteldik áýe tasymaldaýshylary úshin avıaotyn otandyq tasymaldaýshylarǵa qaraǵanda qymbatqa satylady? Osynyń saldarynan qazaqstandyq avıatsııa salasy óziniń halyqaralyq básekege qabiletin joǵaltyp, eldiń tranzıttik áleýeti azaıyp barady», - dedi Memleket basshysy Qazaqstan halqyna Joldaýynda.
