Másele psıhologterde ǵana bolsa, áskerdegi ólim-jitim baıaǵyda tyıylar edi – Dánııa Espaeva
ASTANA. KAZINFORM – Qoǵamdaǵy qaýipsizdik pen tártipti qamtamasyz etý máselelerine arnalǵan kóshpeli Úkimet saǵatynda Májilis depýtaty Natalıa Dementeva áskerdegi ólim men sýıtsıdtiń qashan tyıylatynyn surady.
- Áskerı qyzmetshiniń anasy retinde meni de basqa analar sııaqty armııadaǵy qatygez qarym-qatynas, onyń ishinde áskerılerdiń ólimi men sýıtsıdine ákep jatqan jaıttar alańdatpaı qoımaıdy. Bul oqıǵalardy jekelegen qaıǵyly jaǵdaı dep qarastyrýǵa bolmaıdy. Bul áskerdegi tárbıe isinde júıelik problema bar ekenin kórsetedi jáne sala bul mindetin durys oryndaı almaı otyrǵanyn kórsetedi. Beıbit ýaqytta sarbazdardyń qaza tabýyn toqtatatyndaı shynaıy sharalar qashan qabyldanady, - dep surady depýtat.
Qorǵanys mınıstriniń qarý-jaraq jáne áskerı tehnıka jónindegi orynbasary Shaıh-Hasan Jazyqbaev áskerde bolyp jatqan keleńsizdikter sarbazdardyń áskerge deıin kórgen ónege-tárbıesinen týyndaıtynyn aıtyp qaldy.
- Osynyń aldynda Іshki ister mınıstri baıandamasynda aıtqan qoǵamdaǵy oqıǵalar, otbasynda, mektepterde bolyp jatqan jaıttar, betimen júrgen balalar, esirtkiniń taralýy sııaqty jaqsy-jaman jaǵdaılarmen Qorǵanys mınıstrligi betpe-bet kelip otyr. Árıne, áskerge kelip jatqan myńnan bir balanyń mundaǵy shekteýlerden keıin psıhologııalyq kúızeliske ushyraýy ábden múmkin. Áskerı psıhologter biliktiligin arttyrý kýrstarynan óte bastady. Jergilikti psıhologııalyq ortalyqtardy da psıhologııalyq ortalyqtardy tartyp jatyrmyz. Jasandy ıntellekt kómegimen telegramm-bot istep tur. Ol bot táýlik boıy áskerı qyzmetshiler men olardyń otbasyna kúızelis, kúrdeli jaǵdaılardy eńserýge kómektesedi, - dedi ol.
Mınıstrlik ókiliniń bul jaýabyna Májilis tóraǵasynyń orynbasary Dánııa Espaeva qarsy ýáj aıtty.
- Psıholog arqyly ǵana sheshýge bolatyn bolsa, bul másele baıaǵyda sheshilgen bolar edi. Árıne, bul jerde ózderińizdegi áskerı bólimderde jumys isteý kerek, - dedi ol.
Buǵan deıin Jambyl oblysyndaǵy sarbaz ólimi boıynsha qylmystyq is tergelip jatqanyn jazǵan edik.