Másele munaıdyń sarqylýynda emes, óndiristi azaıtýdyń saldary bolady – sarapshy

ASTANA. KAZINFORM – Táýelsiz sarapshy, Energy analytics kanalynyń avtory Abzal Narymbetov munaı óndirisiniń kólemine qatysty statıtıska boıynsha pikir bildirdi.

- Táýelsizdik alǵaly beri jylyna 20 mln tonna munaı shyǵarsaq, qazir 90 mln tonnaǵa jetti. Endi bir-eki jylda 100 mln tonnaǵa jetkizý josparda bar. 30 jylda munaı óndirýdi bes ese kóbeıtýge shama jetti, alańdatatyn suraq keleshekte qalaı bolady? Al 2030 jyldan bastap munaı óndirýdi 100 mln-nan tómendetý jospary bar, oǵan sebep jańa ken oryndaryna ınvestıtsııa quıylmaı jatyr, jańa ken oryndary ashylmaı jatyr. Munaı - shekteýli resýrs, onyń qory belgili ýaqytta bitedi. Biz 30 mlrd barrel munaı bar deımiz, ol shamamen 4 mlrd tonna munaı, bul - 2007 jyldan beri ózgermegen statıstıka, - deıdi Abzal Narymbetov.

Sarapshy keltirgen statıstıkaǵa súıensek, 2007 jyldan beri elimiz 10 mlrd barrel munaı óndirdi. 

- Bálkim, bizde 30 mlrd barrel munaı joq. Endi 20 mlrd barrel munaı qaldy, biz jylyna 700 mln barrel munaı shyǵaramyz. Esepteıtin bolsaq, 15-20 jylǵa jetetin munaı qaldy. Másele, munaıdyń sarqylýynda emes, munaı óndirý azaısa, bıýdjetke az tabys ákeledi, biz munaı óndirý kólemin árqashan kóterip otyrǵan elmiz. Eger munaı óndirýdi toqtatsaq, ol kezde ekonomıka qıyndyqqa ushyraıdy, - dep tolyqtyrdy spıker. 

Eske sala ketsek, 2024 jyldyń aıaǵynda Qazaqstan OPEK+ aıasyndaǵy artyq óndiristi óteý merzimin uzartqany habarlady. Energetıka mınıstrligi atalǵan sheshimniń eldiń munaı óndirý naryǵyna qalaı áser etetinine túsinik berdi.