Másele halyqtyń dindarlyǵynda emes, dinı saýatsyzdyqta – Aıda Balaeva

Elimizde destrýktıvti sıpattaǵy materıaldardy anyqtaý boıynsha táýlik boıy monıtorıng júrgiziledi, dep habarlaıdy QazAqparat tilshisi.

«Din máseleleri óte ózekti bolyp tur. Qyrkúıek aıynyń basynda men hıdjab kııý suraqtary boıynsha túsinikteme bergen edim. Másele halyqtyń dindarlyǵynda emes, dinı saýatsyzdyqta. Árıne, búginde biz dástúrli emes dinı aǵymdardyń belsendi jumys istep jatqanyn kórip otyrmyz. Sondyqtan bul baǵytta mınıstrliktiń jumysy úsh baǵytta júrgiziledi», - dedi Mádenıet jáne aqparat mınıstri Aıda Balaeva ortalyq kommýnıkatsııalar qyzmeti alańynda ótken baspasóz máslıhatynda.

Mınıstr keltirgen málimetke sáıkes, destrýktıvti sıpattaǵy materıaldardy anyqtaý boıynsha táýlik boıy monıtorıng júrgiziledi. Ásirese áleýmettik jeliler men ınternet keńistiginde.

«1 qańtardan qyrkúıek aıynyń sońyna deıin ınternette lańkestik jáne dinı ekstremızm qaǵıdattaryn nasıhattaýǵa baǵyttalǵan 14 860 materıal anyqtaldy. Bul degenimiz dinı aǵymdar jumysynyń kúsheıýin bildiredi. Árıne, biz depýtattardyń saýalyn muqııat tyńdap, zerdeleımiz. Bul baǵytta biz «Din týraly» Zańnyń jekelegen normalaryn qaıta qaraý úshin jumys isteıtin bolamyz», - deıdi ol.