Masal ken ornyndaǵy kombınat 7 myń jumys ornyn ashady
BEIJІŃ. QazAqparat - Aqmola oblysyndaǵy Masal temir ken orny bazasynda salynatyn taý-metallýrgııalyq keshen 7 myń jańa jumys ornyn ashýǵa múmkindik beredi, dep habarlaıdy «QazAqparat» HAA-nyń Qytaıdaǵy menshikti tilshisi.
14 mamyr kúni «Masal taý-baıytý kombınaty» JShS ókilderi Qytaıdyń China National Technical Import and Export Corporation (CNTIC) korporatsııasymen jáne Aqmola oblysyndaǵy Masal temir ken orny bazasynda taý-metallýrgııalyq keshenniń qurylysyn qarastyratyn Qytaıdyń EKSIM-bankimen kelisimge qol qoıdy.
«Qurylys kezeńinde 3000 adam, al zaýytty paıdalanýǵa bergen ýaqytta 4000 adam jumyspen qamtylady. Biz joǵary markaly bolatty óndirgimiz keledi. Sebebi, qazir Qazaqstan jylyna bir jarym mıllıon tonna bolatty tolyqtaı shetelden, negizinen Reseıden ımporttaıdy. Bizde bolat quıatyn zaýyttyń múmkindigi joǵary emes - ol jylyna 940 myń tonna bolat óndiredi. Búginde bul jańa úrdis bolyp sanalady, sebebi kásiporyn mobıldi bolýy qajet. Olar kez kelgen ýaqytta qaıta qurylyp, dál qazir bıznes pen ónerkásipke qajetti zattardy óndirýi tıis», - dedi qazaqstandyq jýrnalısterge bergen suhbatynda «Taý-Ken Samuryq» ulttyq taý-ken kompanııasy AQ basqarma tóraǵasy Májıt Turmaǵambetov.
Ol Masaldyń tıtan-magnetıttik - quramynda vanadııi bar temir ken orny ekendigin atap ótti.
