Masa máselesi ýshyǵyp tur: Atyraýda 2 myńnan asa shaǵym tirkelgen
ATYRAÝ. KAZINFORM — Atyraýda masaǵa qarsy júrgizilip jatqan dezınsektsııalyq jumysqa qatysty turǵyndardyń shaǵymy kóbeıdi. Jyl basynan beri «109» biryńǵaı baılanys ortalyǵyna eki myńnan astam ótinish túsip, óńirde ýlaý jumysynyń sapasy qaıta talqylandy.
Shaǵymdardyń basym bóligi Erkinqala aýyldyq okrýgi, sondaı-aq Órken, Jumysker, Juldyz jáne Nursaıa yqshamaýdanynyń turǵyndarynan túsken. Oblys ákimdiginde ótken keńeste osy másele qaralyp, merdiger uıym — «AG Disinfection Services» JShS atqarylyp jatqan jumystar týraly esep berdi.
Kompanııa dırektory Nurlybek Ahmedııarovtyń málimetinshe, dezınsektsııa masanyń kóbeıýine qolaıly ashyq sý aıdyndarynda, onyń ishinde «Sasyq saı» aýmaǵynda júrgizilip jatyr. Bul jumysqa ushqyshsyz basqarylatyn apparattar tartylǵan. Búginge deıin áýe arqyly 30 ret óńdeý júrgizilip, ár reıste 30 lıtrden arnaıy preparat shashylǵan. Sonymen qatar «Erik Mostovoı» arnasyn óńdeýge tórt arnaıy tehnıka jumyldyrylǵan. Kún saıyn keshki ýaqytta kósheler men qoǵamdyq oryndardy óńdeýge on arnaıy avtokólik shyǵarý josparlanyp otyr.
Bıyl Atyraý qalasynda dezınsektsııalyq jumystarǵa 101 mıllıon teńge bólingen. Ákimdiktiń aqparatyna súıensek, josparly jumystyń shamamen 40 paıyzy oryndalǵan. Ýlaý kezinde «Agran», «Mıstral», «Faskon», «Solfak» jáne «Tsıpermetrın» preparattary qoldanylyp jatyr. Merdiger uıym olardyń adamdar men úı janýarlary úshin qaýipsiz ekenin málimdedi. Dezınsektsııa kún saıyn saǵat 21:00–den tańǵy 06:00–ge deıin júrgiziledi.
Degenmen turǵyndardyń shaǵymynyń kóp bolýy bul jumystardyń nátıjesine qatysty suraqtardyń saqtalyp otyrǵanyn kórsetti. Osyǵan baılanysty keńeste dezınsektsııanyń sapasy men uıymdastyrylýyna erekshe nazar aýdaryldy.
— Jaýapty mekemelerge sý aıdyndaryna jaqyn ornalasqan aýmaqtardy tolyq qamtyp, jumysty kúsheıtý tapsyryldy. Sondaı-aq sanıtarııalyq-epıdemıologııalyq baqylaý departamenti merdiger uıym qyzmetiniń talaptarǵa sáıkestigin tekseretin boldy. Tekserý barysynda lıtsenzııalardyń bolýy, arnaıy tehnıkanyń jetkiliktiligi, eritindilerdi daıyndaý tehnologııasy men qoldanylatyn preparattardyń mólsheri saralanady, — delingen habarlamada.
Budan bólek, dezınsektsııa jumystarynyń naqty kestesin bekitip, onyń oryndalýyn qatań baqylaý, qajet bolǵan jaǵdaıda qosymsha merdiger uıymdardy tartý jáne júrgizilip jatqan jumystar týraly turǵyndardy aldyn ala habardar etý mindeti qoıyldy.
Aıta keteıik, buǵan deıin atyraýlyqtar maýsym aıynda bıyl masaǵa qarsy kúreske 172 mln teńgeden astam qarjy bólingenine qaramastan, júrgizilip jatqan dezınsektsııa nátıjesine kóńili tolmaıtynyn aıtqan edi.
