Mas júrgizýshiniń kóliginen esirtki men sýyq qarý tabyldy
TÚRKІSTAN. QazAqparat - Túrkistan oblystyq PD uıymdasqan qylmysqa qarsy kúres basqarmasy men jergilikti polıtsııa qyzmektkerleri oblys ortalyǵyndaǵy kóshelerediń birinen jol kólik erejesin buzǵan «Folksvagen» kóligin toqtatqan. Alaıda kólik tizgindegen júrgizýshi tártip saqshylarynan qashýǵa talpynǵan, dep habarlaıdy QazAqparat tilshisi.
Oblystyq PD málimetinshe, kúdiktini ustaý sharasy 5 qarasha kúni bolǵan. Tártipke baǵynǵysy kelmegen júrgizýshi baǵdarshamnyń qyzyl túsinen ótip, keıinnen kóligin tastaı salyp qashqan. Alaıda kóp uzamaı polıtseılerdiń qolyna tústi. Tekserý barysynda onyń Túrkistan qalasynyń turǵyny ekeni jáne mas kúıinshe rólge otyrǵany anyqtaldy. Kóligin tekserý barysynda ańshy myltyǵy men sirińke qorapshasyna salynǵan marıhýanaǵa uqsas esirtki shóbi tabyldy.
«Qazirgi tańda atalǵan derek boıynsha Qylmystyq kodekstiń 287 («Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý») jáne 296 («Esirtki, psıhotroptyq zattarmen, sol tektestermen, prekýrsorlarmen ótkizý maqsatynsyz zańsyz jumys isteý») baptary boıynsha sotqa deıingi tergeý amaldary júrgizilýde. Sezikti ýaqytsha tergeý abaqtysyna qamaýǵa alynyp, óz qylmysyn tolyq moıyndady. Birqatar sot-medıtsınalyq saraptamalar taǵaıyndaldy. Polıtseıler qolǵa túsken turǵynnyń sýyq qarýdy qandaı maqsatta alyp júrgenin anyqtap jatyr» delingen habarlamada.
Ustalǵan turǵyn sondaı-aq jol erejesin óreskel buzyp, baǵdarshamnyń qyzyl túsine ótkeni, kóligin toqtatý týraly polıtsııa qyzmetkeriniń aıtqanyna baǵynbaǵany úshin ákimshilik jaýapkershilikke tartylatyn boldy.
