Mas júrgizýshini toqtatpaq bolyp jaraqat alǵan polıtseıge orden tabystaldy
«Jasaǵan erligiń úshin II dárejeli «Aıbyn» ordenimen nagradtaldyń. Sol nagradańdy mınıstrdiń tapsyrmasymen ózińniń kókiregińe ilýge kelip otyrmyn, Arhat batyr», – dedi vıtse-mınıstr.
Eske salsaq, Nur-Sultan qalasy PD Mamandandyrylǵan patrýldik polıtsııa batalonynyń qyzmet aǵa ınspektory ótken jyldyń jeltoqsan aıynda asqan erlik kórsetip, jol qaýipsizdigin saqtap qalǵan bolatyn. Ol elordanyń Qoshqarbaev kóshesinde erejeni óreskel buzyp, apatty jaǵdaı týdyryp kele jatqan júk kóligin baıqaıdy. Er adam tártip saqshysynyń talaptaryna baǵynbaı, qozǵalysyn jalǵastyrmaq bolady. Qaıǵyly jaǵdaıdyń aldyn almaq bolǵan Arhat sol sátte aýyr jaraqat alady.
Polıtsııa kapıtanyna eki ret ota jasalǵan. Komada bolǵan jigit búginde esin jıǵan.
«Mektepti «altyn belgige» bitirdi. Odan keıin Eýrazııa ulttyq ýnıversıtetine tústi. Sol ýnıversıtetti de jaqsy támamdady. Odan keıin akademııasyn oqydy. Óziniń armany bolatyn. Jumysqa ornalasty. Endi sol armanyna jetti dep otyr edik… Polıtsııa jumysy – óte aýyr jumys. Eldiń amandyǵyn oılaıtyn jumys qoı. Barlyǵy balańyz erlik jasady dep jazyp jatyr. Balamnyń erlik jasaǵanyna qýanamyn. El azamaty bolǵanyna qýanamyn», – dedi Arhattyń anasy Alma Rakısheva.
Áriptesteri de Arhatty árdaıym qoldap, kómekterin aıamaýda. Onyń aldaǵy emin de vedomstvo tolyq qamtıtyn bolady.
«Aýrýhanada da men ózim janynda boldym. Kórdim qandaı bolǵanyn. Departamenttiń aýrýhanasyna da kóp raqmet. Qoldarynan kelgenin jasady. 24 saǵat boıy men baılanystamyn. Qandaı kómek bolsa da qol ushyn berýge daıynbyz», – dedi Nur-Sultan qalasy PD Mamandandyrylǵan patrýldik polıtsııa batalonynyń vzvod komandıri Nurbek Kagıbaev.
Mas kúıde kólik tizgindegen júrgizýshi 8 jylǵa bas bostandyǵynan aıyryldy.
