Mas júrgizýshini saý etip kórsetken qostanaılyq narkologtarǵa sot úkimi shyqty
QOSTANAI. QazAqparat – Medıtsınalyq kýálandyrý nátıjelerin ózgertken Qostanaı oblystyq psıhıkalyq densaýlyq ortalyǵynyń laýazymdy tulǵalaryna qatysty sot úkimi shyqty, dep habarlaıdy QazAqparat tilshisi.
«Aıyptalýshy M. óziniń qaramaǵyndaǵy S., M-te jáne H-nyń baıandamasynan Sh-nyń kólik quralyn basqarý kezinde mas kúıinde bolǵanyn jáne ony ákimshilik jaýapkershilikten zańsyz bosatý maqsatynda S. jáne M-te narkologtaryna kýálandyrý nátıjelerin ózgertýdi tapsyrǵan», - delingen sot materıalynda.
Aıyptalýshylar sotta óz kinásin tolyq moıyndaǵan.
«Sot aıyptalýshy M-ǵa Qylmystyq kodekstiń 58-babynyń 2-bólimin qoldana otyryp, 2 jylǵa bas bostandyǵyn shekteý arqyly belgili bir laýazymdardy ıelený jáne belgili bir qyzmetpen aınalysý quqyǵynan ómir boıy aıyrý jazasyn taǵaıyndady. S. jáne H-ǵa qatysty jazany óteýdiń barlyq merzimine probatsııalyq baqylaý belgileı otyryp, 1 jyl 6 aıǵa, al M-te 1 jylǵa bas bostandyǵyn shekteý jazasy taǵaıyndaldy», - delingen sot úkiminde.
Úkim zańdy kúshine engen joq.
