Mas júrgizýshilermen kúres: Qostanaı oblysynda patrýlder sany artty
Búgin patrýldik polıtsııa qyzmetimen ótken keńeste oblystyq Polıtsııa departamentiniń bastyǵy Beket Aımaǵambetov óńirde maskúnemdikpen kúres jónindegi aktsııanyń bastalǵanyn habarlady. Sonymen qatar patrýlder sanyn eki esege arttyrýdy tapsyrdy.
Ótken aptada mas júrgizýshilerdi anyqtaýǵa qatysty reıdtik sharalar ótkizildi. Jergilikti polıtsııa qyzmetiniń basqarma bastyǵy Qurmet Májikenovtiń aıtýynsha, oblystyń úsh turǵyny júrgizýshi káýliginen aıyrylsa da, mas kúıinde rýlge otyrǵan. Olarǵa qatysty QR QK 346-baby 1-bóligi boıynsha sotqa deıingi tergeý bastaldy.
«Demalys kúnderi júrgizýshiler 695-ten astam jol qozǵalysy erejesin buzǵan. Túsindirý jumystaryna qaramastan, mas júrgizýshilerge qatysty zań kúsheıse de, mundaı jaǵdaılar azaıar emes. Zań normalary aıtarlyqtaı kúsheıtildi, patrýldeý bastaldy, ol týraly polıtsııa BAQ-ta keńinen jarııalaǵan. Biraq rýlde mas kúıinde júrgen júrgizýshiler sany azaıǵan joq», - deıdi patrýldik polıtsııanyń aǵa serjanty Qaırat Ismaqov.
Aıta keteıik, 2020 jyldyń 11 qańtarynan bastap mas júrgizýshilerge zańnama qatańdatyldy. Eger olar jol-kólik oqıǵasyna sebepker bolsa 3000 AEK-ke deıin aıyppul salynady jáne sol mólsherde túzeý jumystaryna tartylady. Buǵan qosa 1200 saǵatqa deıin qoǵamdyq jumystarda bolyp, úsh jylǵa deıingi merzimge bas bostandyǵynan aıyrylýy múmkin.
«Eger jol-kólik oqıǵasyna kisi ólimmen aıaqtalsa, onda júrgizýshi 10 jylǵa bas bostandyǵynan jáne kólik júrgizý quqyǵynan aıyrylady. Eger eki jáne odan da kóp adam qaza tapqan bolsa, ómir boıyna kólikke miný quqyǵynan shetteledi. Kólik júrgizý quqyǵynsyz jáne mas kúıinde júrgizgeni úshin salynatyn aıyppul 200-den 5 000 AEK-ke deıin ulǵaıdy. Al júrgizýshi bes jylǵa deıin bas bostandyǵynan aıyrylýy múmkin», - dedi Qaırat Ismaqov.
