Mas júrgizýshi sebepshi bolǵan jol apatynan 4 adam zardap shekti
PAVLODAR. QazAqparat – 28 shilde kúni saǵat keshki 11-ler shamasynda «Omby-Maıqapshaǵaı» tasjolynyń Beregovoe jáne Bashmachnyı aýyldarynyń aralyǵynda «21214» jáne «MERCEDES-BENZ SPRINTER» kólikteri soqtyǵysty, dep habarlaıdy QazAqparat Pavlodar oblystyq PD baspasóz qyzmetine silteme jasap.
Jol apaty saldarynan «21214» kóliginiń 27 jastaǵy júrgizýshisi men 17 jastaǵy jolaýshysy, sondaı-aq «MERCEDES-BENZ SPRINTER» kóliginiń eki jolaýshysy, sonyń ishinde 9 jasar qyz túrli jaraqatpen Jelezın aýdandyq aýrýhanasyna jetkizildi.
«Saraptama qorytyndysyna sáıkes, «21214» kóliginiń júrgizýshisi ortasha deńgeıde mas bolǵan. Budan buryn, 2019 jyldyń aqpanynda ol QR Ákimshilik kodeksiniń 608-baby 1-bóligi boıynsha kólik quraldaryn júrgizý quqyǵynan aıyrylǵan», - delingen habarlamada.
Bul fakti tirkeldi. Qajetti saraptamalar taǵaıyndaldy. Sotqa deıingi tergeý jumystary júrip jatyr.
