Mas júrgizýshi 10 jylǵa kólik basqarý quqynan aıyrylýy múmkin
KÓKShETAÝ. QazAqparat – Aqmola oblysynda masań kúıde rólge otyryp, jol apatyna sebepker bolǵan Nur-Sultan qalasynyń 27 jastaǵy turǵyny 10 jylǵa kólik basqarý quqynan aıyrylýy múmkin, dep habarlaıdy QazAqparat oblystyq PD baspasóz qyzmetine silteme jasap.
Aıta keteıik, qańtardyń 11-nen bastap elimizde mas kúıinde kólik basqarǵan júrgizýshilerge jaza qataıtylyp otyr. Naqtyraq aıtsaq, qylmystyq kodekske mas kúıinde jol kólik oqıǵasyn jasaǵandarǵa jaýapkershilik kúsheıtý maqsatynda jańa bap (QR QK 345-1) engizildi.
Vedomstvonyń málimetinshe, jol apaty qańtardyń 16-da Esil aýdanynyń aýmaǵynda «Jaqsy-Esil-Buzylyq» tasjolynyń boıynda, ıaǵnı Aqsaı aýyly mańynda bolǵan.
Oqıǵa ornyna jetken tártip saqshylary Nur-Sultan qalasynyń 27 jastaǵy turǵyny basqarǵan «VAZ-21213» kóligi «Jaqsy-Esil-Buzylyq» tasjolynyń 78 shaqyrymynda joldyń qarsy baǵytyna shyǵyp ketip, Qarakól aýylynyń turǵyny tizgindegen «VAZ-21053» kóligine soǵylǵandyǵyn anyqtady. Osynyń saldarynan ekinshi kólikte otyrǵan 28 jastaǵy qyz ben 17 jastaǵy jasóspirim túrli dene jaraqatymen aýrýhanaǵa tústi.
«Medıtsınalyq saraptamanyń qorytyndysy boıynsha «VAZ-21213» júrgizýshisi rólge mas kúıde otyrǵany anyqtaldy. Osyǵan baılanysty QR QK 345-1 babynyń 1-shi bóligi boıynsha sotqa deıingi tergeý amaldary qolǵa alyndy. Júrgizýshi ustalyp, ýaqytsha ustaý ızolıatoryna qamaldy»,-dedi vedomstvodan.
Atalǵan sanktsııa boıynsha mas kúıde rólge otyryp, adam densaýlyǵyna ortasha aýyr zala keltirilgen jol apatyna sebepker júrgizýshige 1000 AEK kóleminde aıyppul salynady nemese túzeý maqsatyndaǵy jumysqa jegiledi, sondaı-aq 400 saǵattyq qoǵamdyq jumysqa artylyp, 1 jylǵa bas bostandyǵynan aıyrý nemese 10 jylǵa deıin kólik basqarý quqynan aıyrý jazasy qarastyrylǵan.
