Mas jigit elorda áýejaıynda janjal shyǵardy

NUR-SULTAN. QazAqparat – Elorda áýejaıynda polıtsııa qyzmetkerleri Túrkistan oblysynyń turǵynyn QR Ákimshilik quqyq buzýshylyq týraly kodeksiniń birden úsh baby boıynsha jaýapkershilikke tartty, dep habarlaıdy QazAqparat Nur-Sultan qalasy Kóliktegi polıtsııa departamentiniń baspasóz qyzmetine silteme jasap.

28 naýryzda Nur-Sultan qalasy áýejaıyndaǵy jelilik polıtsııa bólimine áýejaı qyzmetkeri telefon shalyp, bir er adamnyń aqparat bıýrosynyń qasynda qoǵamdyq tártipti buzyp turǵany týraly habarlaǵan. Ol Túrkistan oblysynyń 26 jastaǵy turǵyny bolyp shyqty. Tekseris júrgizgen Kóliktegi polıtseıler tártip buzýshynyń qoǵamdyq orynda mas kúıde bolǵany, dórekilik tanytyp, elektrondyq temeki shegip turǵanyn jáne ózine jasalǵan eskertýge mán bermeı turǵanyn anyqtady. Er adam sondaı-aq quqyqqorǵaý organy qyzmetkeriniń talabyna baǵynbady.

Medıtsınalyq kýálandyrý qorytyndysyna sáıkes, onyń ortasha dárejede mas kúıde bolǵany anyqtaldy.

Ustalǵan azamatqa qatysty QR Ákimshilik quqyq buzýshylyq týraly kodeksiniń 440-baby 1-bólimi, 441-baby 1-bólimi jáne 667-baby 1-bólimi boıynsha birden úsh ákimshilik materıal toltyrylǵan. Oǵan 20 AEK kóleminde aıyppul salyndy.

Tártip saqshysynyń zańdy talabyna baǵynbaýǵa qatysty materıal protsessýaldyq sheshim qabyldaý úshin Nur-Sultan qalasynyń mamandandyrylǵan aýdanaralyq ákimshilik sotyna joldandy.