Mas kúıinde rýlge otyrǵan BQO turǵyny ómir boıyna kólik basqara almaıdy

ORAL. KAZINFORM — Batys Qazaqstan oblysynda jyl basynan beri mas kúıinde avtokólik aıdaǵan 39 turǵyn qylmystyq jaýapkershilikke tartyldy.

BQO prokýratýrasynyń baspasóz qyzmetinen málim etkenindeı, osy oraıda Syrym aýdandyq soty QR QK 346-baby 1-bóligine (kólik quraldaryn basqarý quqyǵynan aıyrylǵan jáne alkogoldik mas kúıdegi adamnyń avtokólik aıdaýy) sáıkes qylmystyq iske núkte qoıdy.

Buǵan deıin sottalýshy QR Ákimshilik quqyq buzýshylyq týraly kodeksiniń 608-baby 1-bóligine sáıkes 15 táýlikke qamaqqa alynyp, 7 jyl merzimge, ıaǵnı 2030 jylǵy 11 sáýirge deıin kólik quralyn basqarý quqyǵynan aıyrylǵan. Soǵan qaramastan, odan tıisti qorytyndy shyǵarmaı, mas kúıinde kólik aıdap, qylmystyq quqyq buzýshylyqqa barǵan.

— Sot memlekettik aıyptaýshynyń pikirin eskere otyryp, atalǵan turǵyndy kólik quralyn basqarý quqyǵynan ómir boıyna aıyrdy. Oǵan qosa bir jyl bas bostandyǵynan aıyrý jazasyn kesti, — dep habarlady vedomstvodan.

Eske sala keteıik, budan buryn BQO-da prokýratýra qyzmetkeri ózine-ózi qol jumsaǵanyn jazǵan edik.