Mas kúıinde rýlge otyrǵan aqtóbelik eks-depýtat úshinshi ret sot otyrysyna kelmeı qaldy

Aqtóbe qalalyq máslıhatynyń burynǵy depýtaty Sanııa Muratova rýlge mas kúıinde otyrǵany úshin búgin sot aldynda jaýap berýi tıis edi. Kúshtep ákelý uıǵarymy shyǵarylǵanymen, polıtsııa oryndaı almady, dep habarlaıdy Kazinform.

Qala máslıhatynyń depýtaty bolǵan Sánııa Muratovaǵa qatysty Ákimshilik quqyqbuzýshylyq týraly kodekstiń «Kólik quralyn joldyń júrý bóliginde ornalastyrý, qarsy júrip ótý nemese basyp ozý qaǵıdalaryn buzý» (596-bap) jáne «Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarýyna berý» (608-bap) baptary boıynsha hattamalar toltyrylǵan bolatyn. Ótken aıda ÁQBtK «Kólik quralyn joldyń júrý bóliginde ornalastyrý, qarsy júrip ótý nemese basyp ozý qaǵıdalaryn buzý» baby boıynsha syrttaı sheshim shyǵyp, sýdıa Sánııa Muratovany 6 aıǵa kólik júrgizý quqyǵynan aıyrdy.

Búgin mas kúıinde rýlge otyrǵany úshin sot aldynda jaýap berýi tıis edi. Alaıda ol taǵy da kelmeı qaldy. Al hattama toltyrýshy polıtsııa qyzmetkeri Nurjan Músirepov sol kúni bolǵan oqıǵany baıandady.

«Aqtóbe qalasy Báıishev kóshesinde ornalasqan Altaır dúkeniniń aldynda kólik quralyn toqtatyp, tekserý barysynda júrgizýshiden ıis sezildi. Júrgizýshini medıtsınalyq saraptama ortalyǵynda aparǵan ýaqytta jeńil dárejedegi masańdyq baıqaldy. Sanııa Muratovaǵa ÁQBtK-niń 608-baby 1-tarmaǵy boıynsha ákimshilik hattama toltyryldy. Júrgizýshi ákimshilik hattamamen kelisetinin rastady», - dedi hattama toltyrýshy polıtsııa qyzmetkeri Nurjan Músirepov.

Sýdıa Qaıyrjan Alashuly sot otyrysy kezinde «kúshtep ákelý» uıqarymynyń nelikten oryndalmaǵanyn surady. Alaıda polıtsııa qyzmetkeri Nurjan Músirepov oblys boıynsha bárine habar berilgenin ǵana aıtty.

"Májbúrlep ákelý uıǵarymy oryndalǵan joq. Sol sebepten sot isti qaraýdy 26-qazan kúni saǵat 11:00-ge keıinge qaldyrý kerek dep esepteıdi. Taǵy da oblystyq polıtsııa departamentine uıǵarym jiberemiz. Kelmegen jaǵdaıda QR ÁQBtK-tiń 744-babyna sáıkes hattama toltyrylǵan azamatshasyz qaraımyz», - sýdıa Qaıyrjan Alashuly.

Eske salsaq, qala máslıhatynyń depýtaty Sánııa Muratova mas kúıde kólik júrgizgeni úshin ustalǵan bolatyn.

Keıin ol depýtattyq mandatynan óz erkimen bas tartty.