Mas kúıinde qyzmettik kólikpen ustalǵan Zerendi aýdany ákiminiń orynbasary qyzmetinen bosatyldy
KÓKShETAÝ. KAZINFORM — Mas kúıinde qyzmettik kólikpen ustalǵan Zerendi aýdany ákiminiń orynbasary qyzmetinen bosatyldy. Bul týraly Aqmola oblysy boıynsha memlekettik qyzmet isteri departamentiniń ádep jónindegi keńestiń kóshpeli otyrysynda málim boldy.
Keńeste Zerendi aýdany ákiminiń qyzmettik tártipti nyǵaıtý, qyzmettik ádep norma buzýshylyqtaryn aldyn alý týraly esebi tyńdaldy.
Sonymen qatar, biliktilik talaptaryna sáıkestigi turǵysynan jergilikti atqarýshy jáne ortalyq memlekettik organdarda memlekettik ákimshilik laýazymǵa adamdardy taǵaıyndaýǵa taldaýdyń qorytyndysy qaraldy.
Budan bólek, keńeste mas kúıinde qyzmettik kóliktiń rýline otyryp, artynsha polıtsııa ustaǵan Zerendi aýdany ákiminiń orynbasary Esimhan Baıǵabylovqa qatysty tártiptik is qaraldy.
Osy málele boıynsha Aqmola oblysy boıynsha Memlekettik qyzmet isteri departamentiniń memlekettik qyzmet salasyndaǵy baqylaý basqarmasynyń bas mamany Baýyrjan Nurmaǵambetov baıandama jasady.
Qyzmettik tekseris barysynda 28 qańtar saǵat 23:35 shamasynda Esimhan Baıǵabylovtyń «021 AS 03» memlekettik nómirli qyzmettik avtokólikti mas kúıinde basqarǵany jáne Jol qozǵalysy qaǵıdalarynyń 2-taraýynyń 12-tarmaǵynyń 2-tarmaqshasyn buzǵany anyqtaldy.
Sot qaýlysymen E.Baıǵabylov Ákimshilik quqyq buzý týraly kodekstiń 608-babynyń 1-bóligi boıynsha kináli dep tanyldy jáne osy bap boıynsha ony 7 jyl merzimge kólik basqarý quqyǵynan aıyra otyryp, 15 táýlikke ákimshilik qamaqqa aldy.
Sot qaýlysy 26 aqpanda zańdy kúshine endi.
Sondaı-aq, áleýmettik jelilerge monıtorıng barysynda 9 aqpanda jergilikti jelilerde E.Baıǵabylovtyń Aqadyr aýylynyń turǵynymen telefon arqyly sóılesken jazbasy jarııalanǵany anyqtaldy, onyń barysynda ol aýyl turǵynyna dóreki sóılep, balaǵat sózder aıtqan.
Qyzmettik tergeý barysynda E.Baıǵabylov mas kúıinde avtokólik basqarý jáne Aqadyr aýylynyń turǵynymen dóreki sóılesý derekterin moıyndamady.
Ol áleýmettik jelide jarııalanǵan aýdıojazbadaǵy daýys óziniki emes dep sanaıdy.
Al Aqadyr aýylynyń turǵyny E.Baıǵabylovpen telefon arqyly sóıleskeni jaıly jazbasha túsinikteme berýden bas tartty, tek aýyzsha rastady.
Keńes otyrysyna E.Baıǵabylovtyń ózi kelgen joq.
Keńes qorytyndysy boıynsha Aqmola oblysy boıynsha memlekettik qyzmet isteri departamentiniń basshysy Dýman Ábilev tóraǵalyq etetin ádep jónindegi keńes E.Baıǵabylovtyń Memlekettik qyzmet týraly zań men Ádep kodeksine qaıshy áreketteri úshin Zerendi aýdany ákiminiń orynbasary qyzmetinen shyǵarý týraly usynys jasady.
Aıta ketsek, budan buryn Zerendi aýdany ákiminiń orynbasary 15 táýlikke qamalǵanyn jazǵan edik.
