Mas kúıinde apatqa ushyraǵan astanalyq 4 jylǵa sottalyp ketti

ASTANA. KAZINFORM — Buǵan deıin 7 jyl merzimge kólik júrgizý quqyǵynan aıyrylǵan qala turǵyny qaıtadan mas kúıinde rólge otyryp, jol-kólik oqıǵasyn jasaǵan, dep habarlaıdy Astana qalasy prokýratýrasy.

Sottalýshy Hyundai Starex avtokóligin basqaryp kele jatyp, Astana–Qaraǵandy trassasy men A-105 kóshesiniń qıylysynda rólge ıe bola almaı, Lada Priora kóligimen soqtyǵysqany anyqtaldy. Jol-kólik oqıǵasy saldarynan jábirlenýshige 700 myń teńgeden astam materıaldyq shyǵyn keltirilgen.

— Sot úkimimen júrgizýshi Qylmystyq kodekstiń 346-babynyń 2-bóligi boıynsha kináli dep tanylyp, ómir boıyna kólik quralyn basqarý quqyǵynan aıyrylyp, 4 jylǵa bas bostandyǵynan aıyrý jazasyna sottaldy. Materıaldyq shyǵyn óndirildi, — delingen habarlamada.

Elorda prokýratýrasy azamattardyń nazaryn jol qozǵalysy qaýipsizdigine qatysty mańyzdy jaıtqa aýdardy. 

Vedomstvonyń málimetinshe, kólik quralyn basqarý quqyǵynan aıyrylǵan adamnyń kólik júrgizýi, sondaı-aq alkogoldik, esirtkilik nemese ýytqumarlyq masań kúıde kólik basqarýy — aýyr quqyq buzýshylyq bolyp sanalady. Mundaı is-áreketter úshin zańda qatań jaza kózdelgen. Atap aıtqanda, kináli adam belgili bir laýazymdardy atqarý nemese qyzmetpen aınalysý quqyǵynan ómir boıyna aıyrylyp, 10 jylǵa deıin bas bostandyǵynan aıyrylýy múmkin.

Osydan buryn Premer-mınıstr Oljas Bektenovtiń tapsyrmasymen Aqtóbe oblysy Áıteke bı aýdany Bógetsaı aýylynyń shetinde 12 adam qaza bolǵan jol-kólik oqıǵasynyń sebepterin tergeý jóninde úkimettik komıssııa qurylǵany belgili boldy.