Mas kúıinshe qoǵamdyq tártipti buzǵan eki shetel azamaty reısten túsirildi
ASTANA. QazAqparat - Kólik polıtsııasy «Atyraý - Astana» reısinen mas kúıde qoǵamdyq tártipti buzǵan eki QHR azamatyn reısten alyp qalyp, shetel azamattaryna ákimshilik aıyppul salyndy, dep habarlaıdy QazAqparat tilshisi kólik polıtsııasy departamentiniń baspasóz qyzmetine silteme jasap.
Belgili bolǵandaı, kólik polıtsııasynyń jelilik bólimderiniń kezekshi bólimine «Eır Astana» áýe kompanııasynan ótinim kelip túsken. Anyqtalǵandaı, «Atyraý - Astana» reısi ushar kezde eki jolaýshynyń ózin durys ustamaı, qoǵamdyq tártipti buzǵany habarlanǵan. Ótinish berýshilerdiń aıtýynsha, mas ekeý ózderin jaǵymsyz jaǵynan kórsetip, áýejaı qyzmetkerlerine til tıgizip, ádepsizdik tanytqan.
«Tekserý barysynda olardyń Qytaı Halyq Respýblıkasynyń 51 jáne 41 jastaǵy azamaty ekeni anyqtaldy. Kólik polıtsııasynyń qyzmetkerleri osy jaǵdaıdyń mán-jaıyn anyqtaý úshin joǵaryda atalǵan reısten qujat boıynsha ekeýin alyp qaldy», - delingen habarlamada.
Medıtsınalyq tekseristiń qorytyndysy boıynsha ustalǵandardyń alkogoldi ishimdik ishý deńgeıi «ortasha» ekeni anyqtaldy. Osydan keıin polıtsııa qyzmetkerleri alkogol iship, qoǵamdyq orynda shý shyǵarǵan ekeýine qatysty ákimshilik hattama toltyryp, quqyq buzýshylarǵa 5 AEK (12 625 teńge) kóleminde ákimshilik aıyppul saldy.
Sonymen birge, Atyraý qalasynyń mamandandyrylǵan aýdanaralyq ákimshilik soty usaq buzaqylyqtaryna baılanysty quqyq buzýshylarǵa 5 AEK-ten (12 625 teńge) ákimshilik aıyppul salǵan.
