Mas kúıindegi aýyl turǵyny «KamAZ»-ben kópir ústinde aýdaryldy
ATYRAÝ. QazAqparat – «Atyraý-Astrahan» trassasy boıynda «KamAZ» kóligin tizgindegen mas júrgizýshi kópir ústinde aýdarylyp qaldy, dep habarlaıdy QazAqparat.
Atyraý oblystyq polıtsııa departamentiniń málimetinshe, oqıǵa 12 tamyz kúni saǵat 23:10 shamasynda Isataı aýdany aýmaǵyndaǵy Aqsaı ózeni ústinen salynǵan kópirde bolǵan.
«Aýdarylǵan «KamAZ» kóliginiń júrgizýshisi alkogoldik ishimdik iship, mas kúıinde rýlge otyrǵan. Ol –Qyzylqoǵa aýdanyndaǵy Saǵyz aýylynyń 32 jastaǵy turǵyny. Júrgizýshige qatysty QR Ákimshilik quqyqbuzýshylyq týraly kodekstiń 608-babymen ákimshilik hattama toltyryldy. Quqyqbuzýshy Isataı aýdandyq sotynyń qaýlysymen 8 jylǵa kólik júrgizý quqyǵynan aırylyp, 20 kúnge ákimshilik qamaýǵa alyndy», - dep habarlady departamenttiń baspasóz qyzmetinen.
