Mas kúıinde jol apatyna túsken reseılik akter Mıhaıl Efremov úndeý jasady
MÁSKEÝ. TASS-QazAqparat – Reseılik akter Mıhaıl Efremov jol apatynan keıin úndeý jasady. TASS úndeýdiń tolyq mátinin jarııalady, dep habarlaıdy QazAqparat.
«Sol bir qaraly dúısenbiden beri tórt kún ótti. Men ne aıtarymdy bilmedim, qazir de bilmeımin. Sergeı Zaharovtyń otbasynan qalaı jáne ne dep keshirim suraıtynymdy bilmeımin. Biraq, meni keshirmeıtinin bile tura báribir keshirim suraımyn.
Men qolymnan kelgenshe kómektesemin, árıne qabyl alsa. Ony meni keshirsin dep «satyp alý» úshin emes, kúnámdi jýyp-shaıý úshin jasaımyn. Jubaıymnan, balalarymnan keshirim joq. Maǵan sengen adamdardan da.
Rólge mas kúıde otyrǵanym keshirilmeıtin áreket boldy. Sonyń saldarynan kúnásiz adam, jaqsy azamat, meniń qurdasym qaza tapty.
Men ári qaraı qalaı ómir súrerimdi bilmeımin. Kóp adam meni ártis retinde jazadan qutylyp ketedi dep oılap júrgen shyǵar. Joq, men olaı jasamaımyn, tanystarymdy ortaǵa salmaımyn.
Barlyǵy oqıǵany kórgennen keıin qalaı qutylasyń. Esimdi jıǵannan keıin men de kórdim. Qudaıǵa shúkir, anam kórgen joq. Bul kıno emes, artqa eshteńe aınaldyra almaısyń. Bári bitti, endi Efremov joq.
Barlyǵyn satyp kettim. Keshirińizder, ótinemin. Basqa aıtar sózim joq», - dedi akter.
Eske salaıyq, 8 maýsym kúni Máskeý qalasy Smolensk alańynda Jeep Grand Cherokee kóligin tizgindegen reseılik akter Mıhaıl Efremov qarsy jolaqqa shyǵyp ketip, fýrgonmen soqtyǵysty.
Fýrgon júrgizýshisi – 57 jastaǵy Sergeı Zaharov aýrýhanada jatyp kóz jumdy. Akter oqıǵa ornynda ustalyp, medıtsınalyq tekserýge jiberildi. Keıinnen medıtsınalyq saraptama onyń mas bolǵanyn rastady.
