Mas kúıinde kombaın júrgizip, isti boldy - Pavlodar oblysy
PAVLODAR. QazAqparat – Pavlodar oblysynda mas kúıinde kombaın júrgizgen turǵyn jazalandy. Er adamnan túski úzilis kezinde alkogoldi ishimdik ishkeni anyqtaldy, dep habarlaıdy QazAqparat Pavlodarnews.kz-ke silteme jasap.
Pavlodar oblystyq polıtsııa departamentiniń baspasóz qyzmetiniń habarlaýynsha, Ýspen aýdanynyń polıtsııa bóliminiń qyzmetkerleri jol-kólik oqıǵalarynyń aldyn alý maqsatynda arnaıy tekseris jumystaryn júrgizgen.
Reıd barysynda polıtseıler júrgizýshilerge jol-kólik oqıǵasynyń negizgi sebepterin atap ótip, olarǵa oqıǵalardyń aldyn alý úshin qaýipsizdik sharalaryn túsindirýde.
- Kezekti reıdtik is-shara barysynda Beloýsovka aýylynyń mańynda tártip saqshylary júrgizýshisi ortasha dárejede mas kúıinde bolǵan kombaındy toqtatty. Er adam túski úzilis kezinde ishimdińishken, sodan keıin daladaǵy jumysyn jalǵastyrǵan. Júrgizýshige qatysty QR ÁQBK 608-babynyń 1-bóligi boıynsha ákimshilik hattama toltyrylyp, 15 táýlikke ákimshilik qamaýǵa alyndy, - dedi jergilikti polıtsııa bastyǵy Qýandyq Shahmanov.
Aıta ketelik, aǵymdaǵy jyly Ýspen aýdanynyń aýmaǵynda polıtsııa qyzmetkerleri mas kúıinde kólik tizgindegen 20 júrgizýshini anyqtaǵan.
